Մենք հասկացանք, որ սա ծանր մարտ է լինելու․ Պենտագոնը՝ Ուկրաինայի հակահարձակման մասին

ԱՄՆ-ն ի սկզբանե հասկացել է, որ Ուկրաինայի հակահարձակումը դժվար է լինելու, սակայն կարծում է, որ Կիևն ունի անհրաժեշտ զենքեր, ասել է Պենտագոնի խոսնակի տեղակալ Սաբրինա Սինգհը։ 

«Մեր գնահատականներն ի սկզբանե բավականին պարզ էին… Մենք հասկացանք, որ սա ծանր մարտ է լինելու», - ասել է նա լրագրողներին՝ պատասխանելով այն հարցին, թե ինչպես է Վաշինգտոնը գնահատում Ուկրաինայի հակահարձակման ընթացիկ արդյունքները: 

Սինգհը հավելել է, որ Կիևին ժամանակ է պետք, սակայն ԱՄՆ-ն վստահ է, որ ուկրաինացիներն անհրաժեշտ կարողություններ ունեն հակահարձակում իրականացնելու համար։ 

Յուժնո-Դոնեցկի, Զապորոժիեի և Արտյոմովսկի ուղղություններով ուկրաինական հակահարձակումը սկսվել է հունիսի 4-ին, Ուկրաինայի Զինված ուժերի հիմնական հարձակումը կենտրոնացած է ռազմաճակատի Զապորոժիեի հատվածում: Կիևը մարտի է նետել ՆԱՏՕ-ի մասնագետների կողմից պատրաստված և արևմտյան տեխնիկայով զինված բրիգադներին։ Հունիսի 13-ին ռազմական հրամանատարների հետ հանդիպմանը ՌԴ նախագահ Վլադիմիր Պուտինը հայտարարել է, որ ուկրաինական զորքերը հարձակման ընթացքում մեծ կորուստներ են կրում և ոչ մի ուղղությամբ հաջողության չեն հասել։