«Ռուս խաղաղապահն արցախցիների անվտանգության երաշխավորն է, որովհետև Փաշինյանը ձեռքերը լվացել է». Մամիջանյան
Արցախում գտնվող հայրենակիցների ֆիզիկական անվտանգության երաշխավորը ռուս խաղաղապահն է։ Այսօր Ազգային ժողովում ճեպազրույցի ժամանակ այս հայտարարությունն է արել ԱԺ «Պատիվ ունեմ» խմբակցության ղեկավար Հայկ Մամիջանյանը` ավելացնելով, որ սա հաշվի առնելով` միշտ չէ, որ կարող է տալ այնպիսի գնահատականներ, որոնք կցանկանար։
Լրագրողը խնդրեց պատգամավորին մեկնաբանել հունիսի 15-ին Հակարիի կամրջի մոտ ադրբեջանական դրոշ բարձրացնելու փորձն ու խաղաղապահների ներկայությունը։
«Ես գիտեմ, թե ինչպես պետք է խոսի ՀՀ Ազգային ժողովի պատգամավորը։ Սովոր եմ անվտանգության երաշխիքները համեմատության մեջ դնել իրականի, այլ ոչ թե երազելիի հետ»,– ասել է Մամիջանյանը։
Նրա կարծիքով` իշխանական խմբակցությունների ներկայացուցիչների նպատակն է իրենց այս կամ այն օտարերկրյա տերերին հաճոյանալը, մինչդեռ ինքը նման նպատակ չունի։
«Եթե ավելի կոնկրետ պատասխան եք ակնկալում` արդյոք ես 100 տոկոսով գոհ եմ մեր ռազմավարական դաշնակցի, մեր անվտանգության հովանոցի գործելաոճից, ինչպես և ցանկացած ՀՀ քաղաքացի, իհարկե, ո՛չ, բայց, իհարկե, գիտակցում եմ, որ այս պահին այնտեղ կանգնած ռուս խաղաղապահն իմ քույրերի և եղբայրների անվտանգության երաշխավորն է, որովհետև Նիկոլ Փաշինյանը ձեռքերը լվացել է Արցախից»,– նշել է պատգամավորը։
Հունիսի 15-ի առավոտյան՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման փորձը կանխվել է։
Ժամը 13:35-ին էլ Սյունիքի Տեղի հատվածում Ադրբեջանի ԶՈւ-ի արձակած կրակոցների հետևանքով վիրավորում է ստացել ԱԱԾ սահմանապահ ծառայության զինծառայող:
Ժամը 15:10-ին Ադրբեջանի ԶՈւ-ն Կապանի հատվածում տեղակայված հայկական դիրքի վրա կիրառել է ԱԹՍ։
