Մինչև հունիսի 1-ին ԱՄՆ-ը կարող է առանց փողի մնալ
ԱՄՆ ֆինանսների նախարար Ջանեթ Յելենը նախազգուշացրել է, որ եթե Կոնգրեսը չբարձրացնի ԱՄՆ պետական պարտքի վերին շեմը, ԱՄՆ կառավարությունը կարող է մինչև հունիսի 1-ը սպառել իր միջոցները: Սա կբերի դեֆոլտի։ Ըստ BBC-ի, առանց պարտքի վերին շեմի բարձրացնելու՝ ԱՄՆ իշխանությունները չեն կարողանա նոր վարկեր ստանալ։ Յելենը Կոնգրեսին հորդորել է հնարավորինս արագ բարձրացնել շեմը, որն այժմ սահմանվում է 31,4 տրիլիոն դոլար:
ԱՄՆ պաշտոնյաներն ասում են, որ իրենք ստիպված են ավելի շատ պարտք վերցնել, քանի որ եկամտահարկից ստացված եկամուտը սպասվածից քիչ է եղել, իսկ պետական ծախսերը՝ նախատեսվածից ավելի:
Բացի այդ, եռամսյակի սկզբի դրությամբ պետական հաշիվներում կանխատեսվածից ավելի քիչ միջոցներ են եղել։ Այժմ, սակայն, հանրապետականները, որոնք վերահսկում են Ներկայացուցիչների պալատը, դեմ են դեմոկրատ նախագահ Ջո Բայդենի հայտարարած ծախսերի ծրագրին։ Վարկի առավելագույն չափը բարձրացնելու թույլտվության դիմաց նրանք պահանջում էին կտրուկ կրճատել պետական ծախսերը և չեղարկել Սպիտակ տան համար կարևոր որոշումները, ներառյալ ուսանողների պարտքերի ներման ծրագիրը և բնապահպանական տեխնոլոգիաների համար հարկային վարկերը:
