Արցախցի պատգամավորն ասել է` ինչ են նախատեսում քննարկել ադրբեջանական կողմի հետ
Արցախյան կողմը ենթակառուցվածքների, ճանապարհի, էլեկտրաէներգիայի, գազի մատակարարման վերաբերյալ հարցեր քննարկելու համար է հանդիպման առաջարկ արել ադրբեջանական կողմին։ Այս մասին 24News-ին ասաց Արցախի Հանրապետության Ազգային ժողովի «Ազատ հայրենիք - ՔՄԴ» խմբակցության ղեկավար Արթուր Հարությունյանը։
«Նախատեսում ենք քննարկել հումանիտար հարցեր։ Ոչ թե քաղաքական բովանդակություն ունեցող հարցեր, ինչպես օրեր առաջ տեղի ունեցած հանդիպումներն էր ներկայացրել Ադրբեջանը»,- պարզաբանեց պատգամավորը։
«Հայտնել ենք, որ պատրաստակամ ենք հանդիպել, քննարկել, բանակցություններ վարել, բայց այն օրակարգով, որ հայտարարվել էր»,- ընդգծեց Արթուր Հարությունյանը։ Նա ասաց, որ առաջարկն արդեն փոխանցվել է, բայց դեռ պատասխան չկա․
«Այսօր ենք առաջարկը ռուս խաղաղապահների միջոցով փոխանցել ադրբեջանական կողմին, դեռ պատասխան չունենք։ Առաջարկի մեջ հստակ նշված է հումանիտար հարցերի վերաբերյալ»։ Հարությունյանն ասաց նաև, որ ինքը չի մասնակցելու այդ հանդիպմանը՝ հավելելով, որ տեղեկություն չունի, թե արցախյան կողմից ով է մասնակցելու։
Այսօր Արցախի տեղեկատվական շտաբը հայտնել էր, որ Արցախի Հանրապետության իշխանությունները Ռուսաստանի Դաշնության խաղաղապահ առաքելության միջոցով վերջիններիս տեղակայման վայրում և զորախմբի հրամանատարության միջնորդությամբ հանդիպում անցկացնելու առաջարկ են փոխանցել ադրբեջանական կողմին՝ հումանիտար բնույթի անհետաձգելի հարցեր քննարկելու համար։
