ԱՄՆ-ն ոչ մի նշան չի տեսնում, որ Եգիպտոսը զենք է մատակարարում Ռուսաստանին․ Սպիտակ տուն
Սպիտակ տան ազգային անվտանգության խորհրդի ռազմավարական հաղորդակցության համակարգող Ջոն Քիրբին ճեպազրույցի ժամանակ ասել է, որ ԱՄՆ-ն Եգիպտոսից Ռուսաստանի Դաշնություն զենք մատակարարելու նշաններ չի տեսնում։ Այս մասին հայտնում է ТАСС-ը։
Նա այսպես է մեկնաբանել Մոսկվային հրթիռներ վաճառելու Կահիրեի ծրագրերի մասին պնդումները։
«Ես ձեզ կասեմ, որ մենք չենք տեսել որևէ նշան, որ Եգիպտոսը մահաբեր զենք է տրամադրում Ռուսաստանին», - ասել է Քիրբին:
Ավելի վաղ հաղորդվել էր, որ ՌԴ նախագահի մամուլի քարտուղար Դմիտրի Պեսկովը մեկնաբանել է ամերիկյան լրատվամիջոցներում հայտնված տեղեկությունն այն մասին, որ Եգիպտոսն իբր ծրագրել է Ռուսաստանին գաղտնի ուղարկել մինչև 40 հազար հրթիռ։ Կրեմլի խոսնակը հերքել է այս հաղորդագրությունները։
Մինչ այս The Washington Post թերթը, հղում անելով ամերիկյան հետախուզության նյութերին, որոնք արտահոսել էին ցանց, հաղորդում էր, որ Եգիպտոսը գաղտնի պլանավորում է մինչև 40 հազար հրթիռ ուղարկել Ռուսաստանի Դաշնություն։
