Իրանը, ի պատասխան Charlie Hebdo-ի ծաղրանկարների, փակել է ֆրանսիական հետազոտական կենտրոնը
Իրանի ԱԳՆ-ն հայտարարություն է տարածել, որ ի պատասխան ֆրանսիական Charlie Hebdo շաբաթաթերթի ստորացուցիչ գործողությունների՝ փակում է Իրանում Իրանագիտության ֆրանսիական հետազոտական ինստիտուտը, հայտնում են իրանական լրատվամիջոցները:
Հիշեցնենք, որ Թեհրանում Ֆրանսիայի դեսպան Նիկոլա Ռոշը կանչվել է Իրանի արտգործնախարարություն՝ ի նշան բողոքի ֆրանսիական Charlie Hebdo երգիծական շաբաթաթերթի կողմից երկրի բարձրագույն կրոնական առաջնորդ այաթոլլա Սեյեդ Ալի Խամենեիի տասնյակ ծաղրանկարների հրապարակման վիրավորական քայլի դեմ:
«Իրանի Իսլամական Հանրապետությունը ոչ մի կերպ ընդունում իր սրբություններին, իսլամական, կրոնական և ազգային արժեքներին ուղղված վիրավորանքները», - հանդիպման ընթացքում Ֆրանսիայի դեսպանին ասել է ԱԳՆ խոսնակ Նասեր Քանանին:
«Ֆրանսիան իրավունք չունի խոսքի ազատության պատրվակով արդարացնել այլ երկրների և մուսուլմանական ազգերի սրբություններին ուղղված վիրավորանքները», - նշել է նա՝ արտահայտելով Իրանի «խիստ բողոքը» Ֆրանսիայի կառավարությանը։
