Ռուսական նավթի գնի առաստաղի շուրջ բանակցությունները հետաձգվել են

Ռուսական նավթի գների սահմանաչափի շուրջ Եվրամիության (ԵՄ) բանակցությունները հետաձգվել են, քանի որ դիվանագետներին ավելի շատ ժամանակ է պետք տարաձայնությունները հարթելու համար:  Այս մասին հայտնում է Bloomberg-ը՝ վկայակոչելով դեպքին ծանոթ աղբյուրներին։

Այն, որ ԵՄ երկրների միջեւ ռուսական նավթի գների առավելագույն մակարդակի շուրջ բանակցությունները փակուղի են մտել, երեկ՝ նոյեմբերի 23-ին, հայտնել են գործակալության աղբյուրները։  Միաժամանակ գործակալությունը նշել է, որ այսօր՝ նոյեմբերի 24-ին, կարող է տեղի ունենալ եւս մեկ հանդիպում։  Ավելի ուշ Եվրամիությունը հաստատել է, որ չեն կարողանում համաձայնության գալ։

Politico-ն, վկայակոչելով անանուն դիվանագետներին, հայտնում է, որ երկրների միջև տարաձայնությունները կապված են, մասնավորապես, Լեհաստանի և Բալթյան երկրների դիրքորոշման հետ։  

Հրատարակության տվյալներով՝ նրանք պահանջում են մեկ բարելի դիմաց 30 դոլար առավելագույն չափ։  Միևնույն ժամանակ, ԵՄ երկրների մեծ մասն առաջարկում է մեկ բարելի դիմաց 65-70 դոլարի սահմանաչափ:  Էստոնիան կարող է օգտագործել իր վետոյի իրավունքը, քանի որ մեկ բարելի դիմաց 65-70 դոլար գնային շեմը իշխանություններին «չափազանց բարձր» է թվում։

Նավթի գների առաստաղի սահմանումը նախատեսվում է ԵՄ պատժամիջոցների ութերորդ փաթեթի շրջանակներում։  Դեկտեմբերի 5-ին սպասվում է ռուսական նավթի սահմանափակումների ներմուծում, փետրվարի 5-ին՝ նավթամթերքի նկատմամբ։  

Նոյեմբերի 21-ին ՌԴ փոխվարչապետ Ալեքսանդր Նովակը հաստատել է, որ Ռուսաստանը նավթ չի մատակարարի այն երկրներին, որոնք կմիանան գների առաստաղի մեխանիզմին։  Մեխանիզմն ինքնին ենթադրում է սահմանվածից բարձր գնով վառելիք տեղափոխող լցանավերի ապահովագրման արգելք։