Ահաբեկչական խմբավորումները փորձում են ներթափանցել ԱՊՀ երկրներ. Պուտին
ՌԴ նախագահ Վլադիմիր Պուտինն ասել է, որ ԱՊՀ երկրները նախկինում չեն բախվել այնպիսի ահաբեկչական սպառնալիքների, որոնք ի հայտ են գալիս հիմա։ Այս մասին գրում է ՌԻԱ «Նովոստի»-ն:
«Իսլամական պետություն»-ը և այլ միջազգային ահաբեկչական խմբավորումներ փորձում են ներթափանցել ԱՊՀ երկերներ, ընդգծել է Պուտինը:
Անկախ Պետությունների Համագործակցության Անվտանգության և հետախուզական գործակալությունների ղեկավարների մասնակցությամբ խորհրդի նիստում նա մատնանշել է խաղաղ բնակչության պաշտպանության, ինչպես նաև ստեղծված իրավիճակում կայունության ամրապնդման անհրաժեշտությունը։
«Ակնհայտ է, որ ԱՊՀ-ն ընդհանուր առմամբ և մեր երկրներն առանձին-առանձին դեռ չէին բախվել նման բարդ սպառնալիքներին։ Եվ մեր ընդհանուր խնդիրն է հնարավորինս պաշտպանել մեր ժողովուրդներին, ամրապնդել կայունությունը»,- ասել է Պուտինը։
«Խոսելով ԱՊՀ տարածքում առկա սպառնալիքների մասին՝ նշեմ, որ ԻՊ-ի, «Ալ Կաիդա»-ի և այլ ահաբեկչական խմբավորումների վտանգի մակարդակը չի նվազում, նրանք փորձում են ներթափանցել ԱՊՀ երկրներ, ձևավորել գաղտնի բջիջներ, իսկ զինյալների խմբավորումների կենտրոնացումը Աֆղանստանում, հատկապես Կենտրոնական Ասիայի հանրապետությունների հետ սահմանների մոտ, իհարկե, այս տարածաշրջան ներխուժելու հնարավոր ռիսկ է պարունակում»,- իրավիճակը նկարագրել է Ռուսաստանի ղեկավարը։
