Այո՛, դա քարոզարշավ անելու տեղ չէր․ Ավինյանը՝ «Սուրմալու» առևտրի կենտրոնում արված հայտարարության մասին
Այո՛, դա քարոզարշավ անելու տեղ չէր։ Այս մասին, այսօր՝ օգոստոսի 31-ին, ԱԺ-ում լրագրողների հետ զրույցում նշեց ՀՀ նախկին փոխվարչապետ, Երեւանի քաղաքապետի թեկնածու Տիգրան Ավինյանը՝ մեկնաբանելով «Սուրմալու» առևտրի կենտրոն այցելելուց հետո իր հասցեին հնչող քննադատությունները, փոխանցում է News.am-ը։
«Եվ բացարձակապես նման ցանկություն և միտում չկար այդ ամենի մեջ»,- ասել է Ավինյանը՝ հավելելով, որ լրագրողն իրեն երեք անգամ հարցրել է ՔՊ-ի կողմից Երեւանի քաղաքապետի թեկնածու լինելու մասին, ինչն ինքը հաստատել է:
«Բայց այն վերնագրերը, որոնք ցանկալի էին որոշ լրատվականների համար, նրանք կարողացան ստանալ: Շատ դեպքերում, մենք բովանդակությունը թողած, քլիքվող վենրագրերի հետեւից ենք ընկնում եւ այդտեղ շատ բան է կորում»,-ասել է նա:
Անդրադառնալով ԱԺ-ում իր մասնակցած քննարկմանը, որը վերաբերում էր հրավառություններն արգելող նախագծին, Ավինյանն ասել է, որ հարցը վերաբերում է ձևավորված կենցաղային սովորույթները փոխելուն։
«Հարցը մշակութաբանական է: Մենք պետք է որոշենք` մեզ համար ընդունելի՞ է, որ կնունքներին, հարսանիքներին, ծնունդներին մարդիկ կազմակերպում են հրավառություն` ի հաշիվ այն բնակչության, որ ապրում է այդ շրջակայքում, որովհետև այդ մարդիկ ո՛չ այդ կնունքի մասնակիցն են, ո՛չ հարսանիքի, ո՛չ ծնունդի։ Իրենց տանը հանգիստ քնած են, մեկ էլ` գը՛մփ։ Հիմա պետք է հասկանանք` մենք ուզո՞ւմ ենք, որ այդ տեսակ բիզնեսը լինի»,-ասել է նա:
Հիշեցնենք`«Սուրմալու» առևտրի կենտրոնում տեղի ունեցած պայթյունից 3 օր անց` օգոստոսի 17-ին, «Քաղաքացիական պայմանագիր» կուսակցության վարչության անդամ, ՀՀ նախկին փոխվարչապետ Տիգրան Ավինյանն այցելել էր դեպքի վայր։
Նա ասել էր, որ ողբերգությունը առիթ է պայթուցիկ նյութերի պահպանման կանոններն ու հրավառությունների կազմակերպման մշակույթը վերանայելու մասին մտածելու համար։ Ավինյանը հիշեցրել էր, որ մեկ տարի առաջ`` 2021թ-ին, կառավարությունն օրենսդրական առաջարկ էր ներկայացրել, որով գրեթե սահմանափակվում էր հրավառության միջոցների օգտագործումը մասնավոր միջոցառումների ժամանակ, բայց օրենքի ընդունումը հետաձգվել էր` հաշվի առնելով գործարար համայնքի շահերը։
Լրագրողների հարցին ի պատասխան Ավինյանը նաև ասել էր, որ «Սուրմալուի» տարածք է եկել որպես ՔՊ վարչության անդամ ու Երևանի քաղաքապետի ապագա թեկնածու։
