Հնդկաստանում ջրհեղեղների և անձրեւների հետեւանքով զոհվերի թիվն ավելանում է
Հյուսիսային եւ արեւելյան Հնդկաստանում մուսոնային ինտենսիվ անձրեւների հետեւանքով առաջացած ջրհեղեղներն ու սողանքները վերջին երեք օրվա ընթացքում 50 մարդու կյանք են խլել, հայտնում է Reuters լրատվական գործակալությունը՝ վկայակոչելով երկրի իշխանություններին:
Անձրեւները հարյուրավոր գյուղերում քշել տները՝ թողնելով բնակիչներին արգելափակված վիճակում, մինչդեռ փրկարար խմբերը շտապ տարհանել են ողջ մնացածներին:
Ավելի վաղ դաշնային օդերեւութաբանական գրասենյակը կանխատեսել էր, որ օգոստոսին եւ սեպտեմբերին, ամենայն հավանականությամբ, Հնդկաստանում միջին քանակի տեղումներ կլինեն, ինչը ցույց է տալիս, որ բերքը, ընդհանուր առմամբ, լավը կլինի Ասիայի երրորդ խոշոր տնտեսությունում, որը հենվում է գյուղատնտեսության վրա՝ աճը խթանելու եւ աշխատատեղեր ստեղծելու նպատակով:
Գյուղատնտեսությունը մոտ 15 տոկոսով ներդրում է Հնդկաստանի 2,7 տրիլիոն դոլար արժողությամբ տնտեսության մեջ:
Վերջին երեք օրվա ընթացքում Հիմալայան Հիմաչալ Պրադեշ նահանգում հորդառատ անձրեւները, որոնք ուղեկցվում են սողանքներով եւ ջրհեղեղներով, առնվազն 36 մարդու կյանք են խլել, լրատվական գործակալությանը հայտնել է նահանգի կառավարության ներկայացուցիչը։
Հարեւան լեռնային Ուտարախանդ նահանգի պաշտոնական զեկույցում ասվում է, որ անդադար անձրեւների հետեւանքով զոհվել է չորս, եւ անհետ կորել 13 մարդ:
Արևելյան Օդիշա նահանգում հորդառատ անձրեւների հետեւանքով զոհվածների թիվը առնվազն 6-ն է։
Օդիշա նահանգում ջրհեղեղից տուժել է մոտ 800 հազար մարդ, հազարավոր մարդիկ ստիպված են եղել լքել իրենց տները։ Անձրեւները խաթարել են էլեկտրաէներգիայի եւ ջրի մատակարարումը, վնասվել են ճանապարհային ենթակառուցվածքները: Նահանգի տուժած շրջաններից տարհանվել է 120 հազար մարդ։ Իսկ Արեւելյան Ջարխանդ նահանգում Նալկարի գետը վարարել է եւ քշել տարել հինգ մարդու, որոնցից 4-ի դիերը հայտնաբերվել են:
