Ինչ է կատարվել Արագածոտնի մարզպետարանում. պարզաբանում` ծեծկռտուքի մասին շրջանառվող լուրի վերաբերյալ
Լրատվամիջոցներում շրջանառվող այն տեղեկությունը, ըստ որի, Արագածոտնի մարզպետարանում միջադեպ է եղել՝ չի համապատասխանում իրականությանը։ Այս մասին րոպեներ առաջ հաղորդագրություն տարածեց Արագածոտնի մարզպետարանը:
«Ի պատասխան լրատվամիջոցների հարցումների՝ այս կապակցությամբ պարզաբանում ենք․
երեկ Աշտարակի քաղաքապետ Թովմաս Շահվերդյանի և մարզպետարանի քաղաքաշինության վարչության պետ Հակոբ Ստեփանյանի միջև աշխատանքային հանդիպում է եղել։ Քննարկման ընթացքում որոշ հարցերի շուրջ նրանց կարծիքները չեն համընկել, կողմերը բանավիճել են։
Քաշքշուկի,հայհոյանքների և փոխադարձ հարվածների մասին լուրերը չեն համապատասխանում իրողությանը։
Նշենք, որ Արագածոտնի մարզպետարանի և Աշտարակի համայնքնապետարանի աշխատանքային հարաբերությունները եղել և մնում են սերտ ու արդյունավետ»։
Հիշեցնենք, որ երեկ երեկոյան մամուլում գրվեց, թե Աշտարակի քաղաքապետի և Արագածոտնի մարզի վարչության պետերից մեկի միջև վիճաբանություն է տեղի ունեցել, անգամ եղել էն փոխադարձ հարվածներ:
Մասնավորապես ասվում էր, որ դեպքը է տեղի ունեցել Արագածոտնի մարզում: Աշտարակի քաղաքապետ Թովմաս Շահվերդյանը այցելել է Արագածոտնի մարզպետարան, որտեղ վիճաբանություն է տեղի ունեցել նրա և մարզպետարանի քաղաքաշինության վարչության պետ Հակոբ Ստեփանյանի միջև: Բանը հասել է նրան, որ քաղաքապետի և վարչության պետի միջև քաշքշուկ է տեղի ունեցել ու փոխադարձ հարվածներ են հասցրել միմյանց:
