ՌԴ իշխանությունները ռուսների կրիպտոարժույթի ակտիվները գնահատում են 200 միլիարդ դոլար. Bloomberg
Ռուսաստանի քաղաքացիները ունեն 214 միլիարդ դոլար արժողությամբ կրիպտոարժույթի ակտիվներ կամ ավելի քան 16,5 տրիլիոն ռուբլի: Նման տվյալներ է հաղորդում Bloomberg-ը՝ հղում անելով ՌԴ կառավարության պաշտոնյաների գնահատականին։
Ինչպես նշվում է հրապարակման մեջ, այս գումարը կազմում է համաշխարհային կրիպտոարժութային բոլոր ակտիվների ընդհանուր արժեքի մոտավորապես 12%-ը կամ հիմնական ռուսական ֆոնդային ինդեքսի շուկայական կապիտալիզացիայի մեկ երրորդը:
Գործակալությունը գրում է, որ Ռուսաստանի իշխանությունները չեն ցանկանում կրիպտոարժույթի ուղղակի արգելք, այլ մտադիր են կարգավորել այս ոլորտը հենց ռուսների մեծ խնայողությունների պատճառով։
Հրապարակման համաձայն՝ կրիպտոարժույթի ակտիվների գնահատումն իրականացվել է 2022 թվականի հունվարին՝ կրիպտոբորսայի խոշորագույն օգտվողների IP հասցեների վերլուծության հիման վրա։ Հրատարակությունը պարզաբանում է, որ տեղեկությունը տրամադրվել է երկու աղբյուրի կողմից, որոնք աշխատել են ՌԴ կառավարության և Կրեմլի հետ։
