Դպրոցում սովորող երեխաները մրսած դաս են արել, մեծ թվով ընտանիքներ էլ խնդիրների առաջ են կանգնել՝ քաղաքական դրդապատճառներով

Արարատի մարզի Վեդի խոշորացված համայնքի Շաղափ գյուղի բնակչությունն  արդեն  տևական ժամանակ պարբերաբար  ունենում է  ջրի լուրջ խնդիր: Այս տարվա մեջ արդեն  երեք անգամ  վնասվում է գյուղի գլխավոր ջրագիծը՝ պատճառ դառնալով քաղաքացիների ջրի մագիստրալների  սառչելուն ու խափանվելուն: Մինչ այդ  էլ գյուղի մի մասը մեկ ամբողջ օր  կաթվածահար վիճակում էր հայտնվել՝ էլեկտրոկայանի վնասման պատճառով հոսանքազրկվելով:  1in.am-ը գրում է , որ Էլեկտրակայանը  վնասվել է ինչ-որ անձանց կողմից կրակոցների  պատճառով և դեպքի առիթով  ընթանում է նախաքննություն: Լրատվականի  հավաստի աղբյուրները  պարզել են նաև, որ բնակիչների շրջանում  տարածված է վարկած և համոզմունք, որ գյուղին մեծ վնաս հասցրած միջադեպերը  դիտավորությամբ արված արարքներ են, որոնց դրդապատճառներն իրականում քաղաքական են՝ ուղղված ներկայիս Վեդի համայնքի և վարչական շրջանների ղեկավարների պաշտոնակատարների  դեմ՝ նպատակ ունենալով նրանց դեմ դժգոհություն հրահրել: Քաղաքացիները համոզված են, որ սովորական դարձած այսպիսի հանցավոր, վնասատու երևույթները  անպատժելիության, անգործության հետևանք են, իրավական համակարգի ոչ պրոֆեսիոնալիզմն ու արդարադատություն գործելու կարողության ու կամքի  բացակայությունը:
 

«Առաջին լրատվական»-ը կապ է հաստատել 2022-ի հունվարի 13-ից Գարիկ Սարգսյանի կողմից Վեդի խոշորացված համայնքի Շաղափ վարչական տարածքի ղեկավար նշանակված  Մարո Առաքելյանի հետ, ով զրույցում  հաստատեց, որ ջրագծի վնասման պատճառով համայնքը մեծ վնասներ է կրել: Նա նաև չի հերքել, որ միջադեպն ունի քաղաքական դրդապատճառներ: Հիմնվելով արդեն հայտնի որոշ փաստերի վրա՝ նա հավանական է համարում, որ իրենց քաղաքական  հակառակորդները  այսպիսի անթույլատրելի միջադեպեր կազմակերպելով, փորձում են ներկայիս ղեկավարների պաշտոնակատարների դեմ բողոք հրահրել, վարկաբեկել, որպեսզի  առաջիկայում  կայանալիք արտահերթ  ՏԻՄ  ընտրություններին ընդառաջ իրենց  վարկանիշն ավելի բարձր լինի: «Ես պատահական չեմ համարում, որ  էլեկտրասյունը վթարվել է իմ  պաշտոնավարման հենց հաջորդ օրը՝հունվարի 14-ին, և այն, որ դա կատարվել է հրազենային կրակոցներով: Դիմել ենք իրավապահ մարմիններին և հուսով ենք օբյեկտիվ քննությամբ կբացահայտվի հանցավոր արարքը, որի  հետևանքով  մի օր շարունակ  մի ամբողջ  թաղամաս հոսանքազրկվել է»: Նրա խոսքով՝ իր կասկածներն ավելի հիմնավոր դարձան, երբ որ էլեկտրոցանցից մի օր  աշխատակից չեն  գտել, որ արագ  խնդիրը կլուծի: Սակայն տիկին Առաքելյանն, անմեղության կանխավարկածը չխախտելու համար, չցանկացավ նշել կոնկրետ կասկածյալների՝ ով լինելու մասին: Այնուհանդերձ ով էլ լինի՝ըստ նրա՝մարդկային բանականությունից  դուրս է այդպիսի անմարդկային և անխիղճ արարքը, որի հետևանքով  մեծ վտանգներ ստեղծվեցին  հարյուրավոր բնակիչների, երեխաների կյանքի և առողջության համար: «Մեր գյուղը նախալեռնային է, ձմեռները խիստ են, իսկ մենք չենք օգտագործում գազ, ջեռուցումն ապահովում ենք հոսանքի միջոցով: Այդ պայմաններում  պատկերացնո՞ւմ եք՝ ինչ վիճակում են հայտնվել դպրոցում սովորող երեխաները, ինչպե՞ս են մրսած դաս արել, մեծ թվով ընտանիքներ ի՞նչ խնդիրների առաջ են կանգնել…մեկ ամբողջ օր կաթվածահար վիճակ էր»,-ասում  է Շաղափի վարչական ղեկավարը: