Ղազախստանի 6 քաղաքացի մնացել է Հայաստանում և չի կարողանում հայրենիք վերադառնալ
Ղազախստանի 6 քաղաքացի մնացել է Հայաստանում՝ Երևան-Ակտաու-Երևան ժամանակավորապես չեղարկված չվերթների պատճառով։ Ներկայումս, նրանք տեղակայված են հյուրանոցներում և սպասում են հայրենիք վերադարձին։ Այս մասին Sputnik Արմենիային հայտնեցին Հայաստանում Ղազախստանի դեսպանատնից։
«Նախնական տվյալներով՝ նրանցից մեկը հայրենիք կվերադառնա արդեն երեկոյան։ Եվս 5–ը Հայաստանից կմեկնեն վաղը»,- տեղեկացրեցին դեսպանատնից։
Դիվանագիտական ներկայացուցչությունից նաև հայտնեցին, որ հայրենիք վերադարձին սպասողների թիվն ավելի մեծ է եղել, սակայն նրանց հաջողվել է իրենց խնդիրները լուծել Հայաստանում բնակվող հարազատների ու մտերիմների օգնությամբ։
Դեսպանատանը նշել են, որ համաքաղաքացիներին ակտիվորեն աջակցել են նաև Հայաստանում մշտապես բնակվող ղազախները։
Հիշեցնենք, որ Երևան-Ակտաու-Երևան ուղիղ չվերթերը ժամանակավորապես չեղարկվել են՝ պայմանավորված Ղազախստանում ստեղծված արտակարգ դրությամբ։
