«Պայմանավորվածություն է ձեռք բերվել Ադրբեջանի նախագահի հետ». Նիկոլ Փաշինյան

Կառավարության նիստի մեկնարկին ՀՀ վարչապետ Նիկոլ Փաշինյանը հանդես եկավ հայտարարությամբ. «Բրյուսելում Ադրբեջանի նախագահի հետ հանդիպման ժամանակ վերահաստատել ենք Երասխ-Օրդուբադ-Մեղրի-Հորադիզ երկաթուղու կառուցման մեր որոշումն ու պայմանավորվածությունը: Այն արձանագրվել էր Սոչիում՝ ՌԴ նախագահի միջնորդությամբ տեղի ունեցած հանդիպման ժամանակ և, ահա, Բրյուսելում ԵՄ խորհրդի նախագահի միջնորդությամբ հանդիպմանը, ըստ էության, այս ամեն ինչն արձանագրվեց: Երկաթուղին կգործի սահմանային ու մաքսային՝ միջազգայնորեն ընդունված կանոնների համաձայն, փոխադարձության սկզբունքով՝ երկրների ինքնիշխանության ու իրավազորության ներքո: ՀՀ-ն հասանելիություն կստանա ԻԻՀ ու ՌԴ, Ադրբեջանը երկաթուղային կապ կստանա Նախիջևանի Ինքնավար Հանրապետության հետ: Եթե մեզ հաջողվի որոշակի երկխոսություն սկսել Թուրքիայի հետ ու հասնել սահմանի ու կոմունիկացիաների բացմանը, այս նախագիծը կարող է շատ ավելի մեծ մասշտաբ ստանալ. գիտեք, որ երկաթուղին Երասխից մինչև Գյումրի գոյություն ունի, գիտեք նաև, որ Գյումրիից Կարս երկաթուղի նույնպես գոյություն ունի»:

Վարչապետի խոսքով՝ պայմանավորվածություն է ձեռք բերվել Ադրբեջանի նախագահի հետ՝ շփումները կշարունակելու օրակարգային հարցերի շուրջ՝ փորձելով ձևավորել ընդհանուր տեսակետներ ու մոտեցումներ: