Հայտնի է, թե ով կլինի Հայաստանի հետ հարաբերությունների կարգավորման հարցով Թուրքիայի հատուկ ներկայացուցիչը
Թուրքիան Հայաստանի հետ հարաբերությունների կարգավորման քայլերի շրջանակում հատուկ ներկայացուցիչ կնշանակի Վաշինգտոնում իր նախկին դեսպան Սերդար Քըլըչին։ Այս մասին գրում է Haberler-ը: Լրատվամիջոցը վկայակոչել է երկրի արտգործնախարար Մևլյութ Չավուշօղլուին:
Հիշեցնենք, որ Չավուշօղլուն ավելի վաղ հաղորդել էր, որ Թուրքիան և Հայաստանը հատուկ ներկայացուցիչներ կնշանակեն հարաբերությունների կարգավորման համար:
Ինչի առնչությամբ ՀՀ ԱԳՆ մամուլի քարտուղար Վահան Հունանյանը հայտնել էր. «Հայաստանը, ինչպես մշտապես նախկինում, այնպես էլ այժմ, պատրաստ է Թուրքիայի հետ առանց նախապայմանների հարաբերությունների կարգավորմանն ուղղված գործընթացին, ինչն արձանագրված է ՀՀ կառավարության ծրագրում։
Այս առումով դրական ենք գնահատում Թուրքիայի ԱԳ նախարարի` հարաբերությունների կարգավորման նպատակով հատուկ ներկայացուցիչ նշանակելու մասին հայտարարությունը, և հաստատում, որ հայկական կողմը ևս երկխոսության համար հատուկ ներկայացուցիչ կնշանակի»:
