Նիկոլը չի ամաչում. այսքան ոստիկան Սյունիքի մայրուղու վրա լիներ, ոչ ոք չէր համարձակվի մաքսակետ կառուցել. Գեղամ Մանուկյան
Երեկ ԱԽ քարտուղար Արմեն Գրիգորյանը Հանրային հեռուստատեսությամբ հայտարարել էր, թե այսօրվանից Գորիս-Կապան ճանապարհին ադրբեջանական կողմը մաքսակետեր է տեղադրելու: Այս առիթով կառավարության գլխավոր մասնաշենքի մոտ մեկնարկած բողոքի ակցիան շարունակվում է, մեծանում է թե քաղաքացիների, թե կառավարության շենքը հսկող ոստիկանության աշխատակիցների թիվը։
«Իրենց անվտանգության համար հարյուրավոր ոստիկաններ են բերել այստեղ: Եթե այսքան ոստիկան Սյունիքի մայրուղու վրա կանգնած լիներ, որեւէ մեկը չէր համարձակվի թշնամական մաքսակետ կառուցել»,- մեկնարկած ակցիայի ժամանակ ասաց «Հայաստան» խմբակցության պատգամավոր Գեղամ Մանուկյանը։
«Երեկվանից արդեն այս կապիտուլյանտ իշխանության լուռ համաձայնությամբ կամ դավաճանական համագործակցությամբ, փոխադարձ համաձայնությամբ ՀՀ կարեւորագույն մայրուղիներից մեկի Գորիս-Կապան մայրուղու վրա հաստատվել է թուրքական գերիշխանություն: Իրենք դրանից չեն ամաչում, Նիկոլը չի ամաչում», - ասաց Մանուկյանը։
«Անվտանգության խորհրդի իբր թե քարտուղարը երեկ հպարտանում էր, որ 15 տարվա մեջ ամենալավ ճանապարհն էր սարքել Սյունիքում շրջանցող: Հայրենադավ, դավաճան, կապիտուլյանտ իշխանությունները միայն կարող են դա անել»,- հավելեց Գեղամ Մանուկյանը։
