Մանկապարտեզները կփակվե՞ն. պարզաբանում են քաղաքապետարանից

Ինչպես արդեն  հայտնել ենք, Առողջապահության նախարարությունը դպրոցներում արձակուրդները մեկ շաբաթով հետաձգելու, ինչպես նաև բուհերում դասերը հեռավար կազմակերպելու առաջարկությամբ է հանդես եկել՝ կապված երկրում համաճարակային վիճակով։

Ինչ վերաբերում է մանկապարտեզներին, ArmDaily.am-ի հետ զրույցում Երևանի քաղաքապետարանի մամուլի քարտուղար Հակոբ Կարապետյանը ասաց, որ այդ մասին կտեղեկացնեն։

«Մենք հետևում ենք Առողջապահության նախարարության ցուցումներին և ընդհանուր հակահամաճարակային իրավիճակից բխող գործողություններ ենք անում։ Եթե այդպիսի որոշում լինի՝ անպայման կտեղեկացնենք»,- ասաց Կարապետյանը։

Հարցին՝ քննարկումներ կան մանկապարտեզները փակելու վերաբերյալ, մամուլի քարտուղարը նշեց, որ այդ քննարկումները միշտ են լինում։

«Միշտ ձեռքը զարկերակի վրա է, ամեն օրվա հետ եկած իրավիճակին համապատասխան քննարկումներ և որոշումներ են կայացվում»,- ասաց Կարապետյանը՝ հավելելով, որ հետևելու են Առողջապահության նախարարության առաջարկներին։

Նշենք, որ  այսօր հաստատվել է կորոնավիրուսային հիվանդության 1184 նոր դեպք: Ունենք 1221 առողջացած, 42 մահվան դեպք: Նախորդ օրն արձանագրվել է մահվան 3 դեպք, երբ պացիենտն ունեցել է կորոնավիրուսային վարակ, սակայն մահը վրա է հասել այլ հիվանդության պատճառով։