Այդ գործընթացում մենք սահմանափակված ենք. Փաշինյանը՝ Արցախի կարգավիճակի մասին
«Հայաստան» խմբակցության պատգամավոր Աննա Գրիգորյանը կառավարության հետ հարցուպատասխանի ժամանակ խնդրեց ՀՀ վարչապետին ամբիոնից արձանագրի՝ Արցախի որևէ կարգավիճակ Ադրբեջանի կազմում լինել չի կարող։ Պատգամավորի հարցին ի պատասխան Փաշինյանը կրկին մեղադրեց նախկիններին, նշելով, որ բանակցային ամբողջ գործընթացը եղել է Արցախը Ադրբեջանի կազմում թողնելու վերաբերյալ, իբր, ԼՂ-ն դուրս է թողնվել բանակցային սեղանից։
Պատգամավորը մեկ անգամ էլ խնդրեց հստակ արտահայտել Արցախի կարգավիճակի մասին Կառավարության դիրքրոշումը, ինչին Փաշինյանը կրկին ոչ միանշանակ պատասխան տվեց.
«Հենց դրա համար ես ասել եմ՝ սկսում ենք զրոյական կետից։ Ասել եմ՝ եկեք պարզաբանենք Մադիրդյան սկզբունքները ի՞նչ են նշանակում։
Արդյոք այդ սկզբունքներով կա ուղի, որով ԼՂ-ն կարող է ստանալ կարգավիճակ Ադրբեջանի կազմից դուրս։ Մեր այսօրվա դիրքորոշումները կառավարության ծրագրում հստակ գրված է՝ ԼՂ կարգավիճակի և ինքնորոշման հարցը։ ՀՀ դիրքորոշումը այն է, որ մենք պետք է այդ հարցում առավելագույնս անենք՝ ԼՂ ժողովրդի իրավունքները պաշտպանելու համար։ Այդ գործընթացում մենք սահմանափակված ենք այն փաստաթղթերով ու գործողություններով, որը ձեր քաղաքական ուժի ղեկավարի քվեարկությամբ ընդունվել է ՀՀ կողմից որպես միջազգային հարաբերությունների ընդունելի կանոն։ Մենք սահմանափակված ենք ու կփորձենք ամեն ինչ անել, որ դրանք հաղթահարենք»։
Պատգամավոր Աննա Գրիգորյանը նաև հետաքրքրվեց տարածաշրջանում ձևավորվող 3+3 ֆորմատի մասին։ ՌԴ ԱԳ նախարարը հայտարարել էր, որ կողմերը դրական են արձագանքել ու բանակցություններ է ընթանում Հայաստանի հետ։
«ՀՀ-ն պետք է նախ հասկանա, թե դրանք ի՞նչ ֆորմատներ են, ի՞նչ նպատակով են իրագործվում, ի՞նչ պայմաններով ու սկզբունքներով է գործելու ու այլ մանրամասներ, որպեսզի հստակ դիրքրոշում արտահայտի դրա վերաբերյալ»,- պատասխանեց Փաշինյանը։
