Իշխանությունները ջանք չեն խնայել, որ Առուշանյանը չկարողանա ներկա գտնվել ՏԻՄ ընտրություններին․ պատգամավոր
Այս իշխանությունները ջանք չեն խնայել, որ Առուշ Առուշանյանը ֆիզիկապես չկարողանա ներկա գտնվել ՏԻՄ ընտրություններին: Այս մասին այսօր՝ հոկտեմբերի 8-ին, լրագրողների հետ ճեպազրույցում ասաց «Հայաստան» դաշինքի պատգամավոր Աննա Գրիգորյանը:
Պատգամավորը համոզված է, որ քաղաքական հետապնդում է իրականացվում Առուշ Առուշանյանի նկատմամբ. «Քարոզարշավի ժամանակ նոր երանգներ է ստանում քաղաքական հետապնդման գործընթացը, և, ըստ էության, իշխանությունը ոչ թե քարոզչություն է իրականացնում, այլ հակաքարոզչություն պրն Առուշանյանի նկատմամբ՝ արատավորելով վերջինս բարի համբավը: Հասել ենք նրան, որ ՔՊ պատգամավոր Արմեն Խաչատրյանը փորձում է հարցականի տակ դնել պրն Առուշանյանի մարտական գործողություններում մասնակցելու փաստը: Այսինքն՝ պրն Խաչատրյանը և իր մնացած գործընկերները, որոնք պատերազմի ժամանակ Ազգային ժողովից գումար էին վերցնում, որպեսզի հասնեին Սյունիք և Արցախ, հարցականի տակ են դնում պրն Առուշանյանի մարտական գործողություններում մասնակցելը»,- նշեց Աննա Գրիգորյանը:
