Լարսի անցակետի թողունակությունը 2022 թվականին կավելանա, սա լուրջ գործնական քայլ է․ Դմիտրի Վոլվաչ

«Վերին Լարսի անցակետի թողունակությունը 2022 թվականին կավելանա 6,5 անգամ»,- «Հայ-ռուսական տնտեսական համագործակցություն. հեռանկարային նախագծեր» խորագրով միջոցառման շրջանակում, լրագրողների հետ զրույցում ասել է ՌԴ տնտեսական զարգացման փոխնախարար Դմիտրի Վոլվաչը։

Դմիտրի Վոլվաչը  հայտնել է, որ մինչև 2022 թվականի կեսը Վերին Լարսում կավարտվի վերակառուցումը` մարդատար ավտոմեքենաների, իսկ 2022 թվականի վերջին՝  բեռնափոխադրումների համար։

«Թողունակությունը Վերին Լարսում 6,5 անգամ կավելանա։ Օրական մինչև 2650 բեռնատար մեքենայի անցնելու հնարավորությունը կընդլայնվի՝  հասնելով օրական մինչև 3 000 մեքենայի»,-ասել է նա։   

ՌԴ տնտեսական զարգացման փոխնախարարը սա լուրջ գործնական քայլ է համարել ինչպես երկկողմ, այնպես էլ ԵԱՏՄ  շրջանակում համագործակցության, ապրանքաշրջանառության աճի  համար: