Որոտանի մոտ տեղակայված ադրբեջանական ոստիկանական կետում կտրուկ շատացել են ադրբեջանցի ոստիկաններն ու զինծառայողները. ArmDaily.am

Սյունիքի մարզի Գորիս խոշորացված համայնքի Որոտան բնակավայրի մոտ վերջերս տեղակայված ադրբեջանական ոտիկանական կետում ադրբեջանցիների թիվը շատ է շատացել: Այս մասին ArmDaily.am-ի հետ զրույցում ասել է Որոտանի բնակիչ Արբակը:

«Քիչ առաջ անցա այդ ոստիկանական կետի կողքով: Ադրբեջանցի ոստիկաններ էին կանգնած՝ իրենց ոստիկանական համազգետներով՝ վրաները գրած Polis: Ինժիներական լայնամասշտաբ աշխատանքներ են գնում՝ չգիտեմ ինչ են ուզում կառուցել, բայց հաստատ փոքր շինարարություն չի: Մեր գյուղի բնակչությունը՝ ընտանիքներով, երեխաներով այդքան մարդ չի կազմի, որքան ադրբեջանցիներն այդ ոստիկանական կետի մոտ՝ երևի հարյուրից ավել են դարձել»,-ասել է Արբակը:

Նա նշել է, որ այդ կետի մոտով անցնում են առանց ադրբեջանցիների կողմը նայելու, որպեսզի վերջիններս դա որպես սադրանք չընկալեն: Ադրբեջանցիներից քիչ այն կողմ ռուս սահմանապահներն են, սակայն դրանից լարվածությունը չի թուլանում: Որոտանցի Արբակը նշում է, որ իրենք չեն վախենում ադրբեջանցիներից, սակայն նրանց թվի մեծացումն արդեն իսկ մտահոգիչ է: