Ծանր, շատ ծանր ու կոշտ խոսակցություն եմ այսօր ունեցել Տիգրանաշենի և Տավուշի սահմանային գյուղերի վերաբերյալ. Նաիրի Հոխիկյան
| Լրագրող Նաիրի Հոխիկյանը ֆեյսբուքյան իր էջում գրել է. «Ծանր, շատ ծանր ու կոշտ խոսակցություն եմ այսօր ունեցել Տիգրանաշենի և Տավուշի սահմանային գյուղերի վերաբերյալ։ Քանի որ խոստացել եմ չհրապարակել զրուցակցիս անունը, նշեմ միայն, որ դրել եմ հստակ պահանջներ՝ հրապարակային բացառել ԽՍՀՄ տարիներին Ադրբեջանին նվիրված հայկական տարածքների (Տիգրանաշեն, Բաղանիս-Այրում, Բերդի տարածաշրջանի 2 գյուղերը և այլն) հանձնումը։ Մանրամասն բացատրել եմ, թե ինչ աղետ է ՀՀ կառավարությունը բերել մեր պետականության գլխին՝ թշնամուն տալով Սյունիքի ճանապարհի մի հատվածը և ինչ աղետ կլինի, եթե իրենց թուլամորթության ու նյութապաշտության հետևանքով վտանգի ենթարկվեն նաև Արարատի և Տավուշի մարզերի միջպետական ճանապարհները։ Տիգրանաշենի հանձնումը ոտքի կհանի ամբողջ հայ ազգին՝ ոտնատակ տալով թշնամուն ու նրա հետ գործարքի գնացող կառավարությանը։ Զրուցակիցս խոստացավ նշածներս ներկայացնել համապատասխան անձին և անձերին՝ միաժամանակ երաշխավորելով, որ տարածքներ հանձնելու ներքին որոշում չկա։ Ասացի, որ չեմ վստահում քաղաքական իշխանության որևէ խոսքի։ Չգիտեմ, արդյունք կլինի, թե ոչ։ Բայց բանբերին հստակ և ուղիղ ասացի՝ ոտքս մնալու է գազի ոտնակին մինչև իմ պետականության կայունացում, մինչև անհայրենիք տականքների և արտաքին թշնամու ջախջախում։ Հուսով եմ, հասկացավ և կհասկացնի օբյեկտին»։ |
