Ես դա սխալ եմ համարում․ Մովսես Հակոբյանը՝ գերիների դիմաց ականապ տարածքների քարտեզները փոխանակելու որոշման մասին

«Շնորհավորում եմ», այսպես արձագանքեց գեներալ-գնդապետ, ՀՀ ԶՈՒ նախկին ԳՇ պետ Մովսես Հակոբյանը ArmDaily.am-ի հարցին այն մասին, թե ինչպես է վերաբերվում հետպատերազմյան Հայաստանում հերոսների կամ կոչումների տեղատարափին ու մասնավորապես ՀՀ ԱԱԾ տնօրենին ու Ոստիկանապետին գեներալ-մայորի կոչում շնորհելուն։ Ինչ վերաբերում է գերիների դիմաց ականապատված տարածքների քարտեզները փոխանակելու որոշմանը՝ Հակոբյանը դա սխալ որոշում է համարում։ «Ես դա սխալ եմ համարում։

Գերիների փոխանակումը ամսի 9-ի համաձայնագրի կետերից մեկն է և դրա դիմաց որևէ բան չպիտի փոխանցեին։ Դա է պատճառը»,-ասաց նա։ Ականապատված տարածքների քարտեզները Ադրբեջանին փոխանցելը թշնամու գործը հեշտացրեց՝ ասում է գեներալը։

Անդրադառնալով վերջին շրջանում գերիներին հերոսացնելու ծայր առած միտումներին նա ասաց. «Ցավ եմ ապրում, որ հավասարեցվում են զինվորը, որը պայքարել է մինչև վերջ, որ հայրենիքը չկործանվի և այն, զինվոր էլ չեմ ուզում ասել, որ զենքն առանց որևէ մի բանի վայր է դրել ու հանձնվել՝ դրանք տարբեր մարդիկ են։ Տարբեր երկրներում տարբեր ձև են գնահատում, եթե շատ կուզեն՝ կարող ենք հակառակորդին նայել՝ Ադրբեջանն ինչպես է վերաբերվում գերիներին»,-ասաց Մովսես Հակոբյանը։ Իսկ թե ինչի դա կհանգեցնի՝ նախկին ԳՇ պետը չկարողացավ ասել։

Մեր հարցին այն մասին, թե չի՞ կարծում արդյոք, որ Գրիգորի Խաչատուրովի զորացրումը լուրջ հարված կարող է լինել բանակին, նա ասաց, որ ինքը չի որոշողը՝ Խաչատուրովը պիտի շարունակի ծառայություն իրականացնել, թե հեռանալ՝ հետևաբար զերծ կմնա որևէ մեկնաբանություն անելուց։