Հայտնի է, թե քանի կալանավոր և դատապարտյալ է մասնակցել ընտրություններին
Այսօր ՀՀ քրեակատարողական հիմնարկներում ժամը 20։00-ի դրությամբ քվեարկության իրավունք ունեցող կալանավորվածներից և դատապարտյալներից 812 անձ է մասնակցել ընտրությանը։ Տեղեկությունը հայտնում է քրեակատարողական ծառայությունը։
Նշվում է, որ հունիսի 20-ի դրությամբ քրեակատարողական հիմնարկներում պահվում են 2019 կալանավորված անձինք և դատապարտյալներ։ Նրանցից Կենտրոնական ընտրական հանձնաժողով ներկայացված ցուցակներում ընդգրկված են և ընտրության իրավունք ունեն 999-ը (ՀՀ ընտրական օրենսգրքով սահմանվում է, որ ընտրելու իրավունք չունեն դիտավորությամբ կատարված ծանր և առանձնապես ծանր հանցանքների համար օրինական ուժի մեջ մտած դատավճռով դատապարտված և պատիժը կրող անձինք):
Նշենք, որ քվեարկության ժամանակ ենթադրյալ ընտրական իրավախախտումների վերաբերյալ քրեակատարողական հիմնարկներում հաղորդումներ կամ ահազանգեր չեն ստացվել։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
