Ռուսաստանի հետ երկխոսությունը թուլության նշան չէ․ Բայդենը հանդիպել է ՆԱՏՕ-ի անդամ երկրների ղեկավարների հետ

ՆԱՏՕ-ի գլխավոր քարտուղար Յենս Սթոլթենբերգն ԱՄՆ նախագահ Ջո Բայդենի հետ հունիսի 7-ին կայացած հանդիպումից հետո հայտարարել է, որ կողմերը պայմանավորվել են «զսպել, բայց միևնույն ժամանակ երկխոսություն վարել Ռուսաստանի հետ», հաղորդում է DW-ն։ 

«Մենք քննարկել ենք հարցերի լայն շրջանակ՝ Ռուսաստան, Չինաստան, միջազգային ահաբեկչություն, կիբերսպառնալիքներ, կլիմայի փոփոխություն»,- բանակցություններից հետո լրագրողներին ասել է նա։ 

Սթոլթենբերգի խոսքով՝ Բայդենի հետ համակարծիք են Ռուսաստանի նկատմամբ քաղաքականության հարցում, որը ենթադրում է՝ «արտաքին պաշտպանություն և երկխոսություն»: 

Նա նաև ողջունել է նախքան Ժնևում ՌԴ նախագահ Վլադիմիր Պուտինի հետ բանակցությունները ՆԱՏՕ-ի անդամ երկրների ղեկավարների հետ հանդիպելու ԱՄՆ նախագահի որոշումը: 

«Ռուսաստանի հետ երկխոսությունը թուլության նշան չէ։ Մենք ուժեղ ենք, մենք միասնական ենք։ Մենք պետք է երկխոսություն վարենք Ռուսաստանի հետ»,- հավելել է ՆԱՏՕ-ի գլխավոր քարտուղարը։ 

Ավելի վաղ Բայդենը The Washington Post-ի համար գրված հոդվածում նշել էր, որ Վաշինգտոնը «Մոսկվայի հետ հակամարտություն չի փնտրում, այլ ընդհակառակը, ցանկանում է կայուն հարաբերություններ հաստատել»: 

Նշենք, որ ՌԴ-ի և ԱՄՆ-ի նախագահների հանդիպումը կկայանա Ժնևում՝ հունիսի 16-ին։