Գյուղոլորտի համար գազի սակագնի նվազեցման հարցը քննարկման փուլում է․ մանրամասներ
Էկոնոմիկայի նախարարությունում քննարկում են գյուղոլորտի վերամշակող ընկերությունների համար գազի սակագինը նվազեցնելու հարցը։
Նախարարության Տեղեկատվության և հասարակայնության հետ կապերի վարչությունից տեղեկանում ենք՝ հարցը բարձրացվել է Վահան Քերոբյանի և պտուղ-բանջարեղեն վերամշակող մի շարք ընկերությունների ներկայացուցիչների հանդիպման արդյունքում։
Քննարկման ժամանակ ընդգծվել է, որ գազի սակագինը զգալի նշանակություն ունի ինքնարժեքի ձևավորման մեջ և առաջարկություն է արվել վերանայել ու նվազեցնել այն վերամշակող տնտեսավարողների համար։
Արտադրողները մտահոգություն են հայտնել նաև գյուղատնտեսական արտադրանքի իրացման ԱԱՀ-ի առնչությամբ` նշելով, որ դրա վերանայումը ևս էապես կնպաստի շուկայում տեղական արտադրանքի մրցունակության բարձրացմանը։
Վահան Քերոբյանը տնտեսվարողներին հայտնել է, որ կառավարությունը քայլեր է ձեռնարկում հարկային քաղաքականությունը վերանայելու ուղղությամբ։
Տնտեսվարողներն առաջարկել են նաև վերանայել ու հնարավորինս պարզեցնել մթերումների նպատակով ագրովերամշակման ոլորտին տրամադրվող վարկերի տոկոսադրույքների սուբսիդավորման ծրագիրը։
