Նաիրիտցիները վերսկսել են իրենց բողոքի ակցիաները․ անժամկետ նստացույց կսկսեն, եթե իրենց խնդիրները չլուծվի
Նաիրիտի աշխատակիցները երկար դադարից հետո կրկին բողոքի ակցիա են անում կառավարության մոտ։ Նրանց խնդիրը նույնն է՝ աշխատավարձերի և անվտանգության հարցը: Ակցիայի մասնակիցներից մեկը տեղեկացրեց, որ վաղը քննարկում է լինելու, հրավիրելու են շահագրգիռ կողմերին, նաև գործարանի աշխատակիցներին: Նրանք նշեցին, որ եթե չլուծեն իրենց հարցերը, անժամկետ նստացույց են սկսելու կառավարության դիմաց, 7 ամիս սպասել են:
«Թե քանի օրում աշխատավարձի հարցը կլուծվի, երբ կլուծվի, վաղը կանդրադառնան, որոշվելու է՝ ինչ եղանակով վճարում կատարեն, նաև ում միջոցով վճարվի»,- նշեց կառավարության ներկայացուցչի հետ հանդիպած նաիրիտցին:
Նաիրիտցիներն ասել են, որ առաջ 120 հոգու գումարը ԱԻՆ էր տալիս կառավարության ֆոնդից, հիմա այդ 120 հոգու աշխատավարձն էլ թողել են Նաիրիտի վրա, 240-250 հոգու աշխատավարձ պետք է գործարանը վճարի, իսկ այն սնանկ գործարան է։ Պետք է ապրանք վաճառի, որ աշխատողին աշխատավարձ տա:
«Մեռած է «Նաիրիտը»՝ կամ թաղեն, կամ վառեն, ոչ այն են անում, ոչ այն, թողել են խոլերայի բուն: 25 հազար տոննա հրդեհավտանգ քիմիական նյութեր կան, պետք է վնասազերծեն, որպեսզի էկոլոգիապես վնաս չտա, մարդու առողջության վրա չազդի»,- նշեց ակցիայի մասնակիցներից մեկը:
Մեկ այլ նաիրիտցի շարունակեց. «Նաիրիտը Հայաստանի համար վտանգավոր գործարան է, ունի հազարավոր տոննա պայթունցիկ նյութեր»:
Նրանք նշեցին, որ եթե չլուծեն իրենց հարցերը, անժամկետ նստացույց են սկսելու կառավարության դիմաց, 7 ամիս սպասել են:
