Սաուդյան Արաբիայի դատարանը չեղարկել է Ջ. Հաշոգիի սպանության համար նախկինում դատապարտված 5 անձի մահապատիժը

Սաուդյան Արաբիայի դատարանը չեղարկել է լրագրող Ջամալ Հաշոգիի սպանության համար նախկինում դատապարտված 5 անձի մահապատիժը։ Այս մասին հայտնում է BBC News թելագրամ-ալիքը: 

Հիշեցնենք, որ Սաուդյան Արաբիայի դատախազությունը դեռ  2019 թվականի դեկտեմբերի 23-ին տեղեկացրել էր, որ երկրի դատարանը 5 հոգու մահապատժի է դատապարտել լրագրող Ջամալ Հաշոգիի` 2018-ի աշնանը Ստամբուլում տեղի ունեցած սպանության համար:

Մեղադրյալներից ևս երեքը, ըստ Սաուդյան Արաբիայի գլխավոր դատախազի, դատապարտվել էին երկարաժամկետ ազատազրկման: Թագաժառանգ Մոհամադ Բին Սալմանի մերձավոր զինակից և խորհրդական Սաուդ ալ Քահթանին, որին կասկածում էին Հաշոգիի (Խաշոգիի) սպանության գլխավոր կազմակերպիչը հանդիսանալու մեջ, ազատ է արձակվել:

«Հետաքննությունը պարզել է, որ Քահթանին սպանության հետ որևէ առնչություն չունի», - հայտարարել էր դատախազը:

Հիշեցնենք, որ ըստ վարկածներից մեկի Սաուդցի լրագրող Ջամալ Հաշոգին խեղդամահ էր եղել, երբ փորձել էր փախուստի դիմել Ստամբուլում գտնվող սաուդական հյուպատոսարանից, այնուհետև նրա մարմինը փոխանցել էին տեղացիներից մեկին, որպեսզի ազատվեն հանցանշաններից: 

Իսկ  ըստ թագավորության պաշտոնական վարկածի՝ հոկտեմբերի 2-ին Հաշոգին ծեծկռտուք է հրահրել հյուպատոսարանում իրեն դիմավորած անձանց հետ, որի ժամանակ սպանվել է: Հաղորդվեց 18 ձերբակալվածի և երկու պաշտոնանկության մասին: