Խաշթառակցի 5 երեխաները մանկատուն են տեղափոխվել. ArmDaily

ArmDaily.am-ի տեղեկություններով՝ Տավուշի մարզի Խաշթառակ գյուղի հայտնի ընտանիքի 5 երեխաները, ովքեր «Մուրացան» հիվանդանոցում էին, այսօր տեղափոխվել են մանկատուն։ 

Ավելի վաղ լրատվամիջոցի հետ զրույցում երեխաների տատիկը՝ Էմման, հայտնել էր, որ հիվանդանոցից դուրս գրվելուց հետո ինքը տուն է գնալու, իսկ երեխաներին տեղափոխելու են մանկատուն. «Այս վիճակում ես չեմ ուզում տուն տանեմ, ավելի լավ է մանկատանը լինեն, հետո տեղափոխեն մեր Իջևանի «ՍՕՍ» մանկական գյուղ»: 

Հիշեցնենք, Տավուշի Խաշթառակ գյուղում 58-ամյա տղամարդը դաժան ծեծի էր ենթարկել իր 4-ամյա և 6-ամյա թոռներին։ 6-ամյա երեխան հիվանդանոցում մահացել էր։ Այսօր մենք գրել էինք, որ երեխաների մայրը «Սևանի» ԲԿ-ում մահացել էր։

Ընտանիքի մյուս 5 երեխաները ևս տեղափոխվել էին Մուրացան հիվանդանոց։ Նրանց արյան մեջ մկնդեղ էր հայտնաբերվել:

Երեխաների պապը օրեր առաջ տեղափոխվել է Արմենիա ԲԿ, որտեղ վերջինիս արյան մեջ մկնդեղ են հայտնաբերել։ Երեկ վերջինիս կինը մեզ հետ զրույցում հայտնել էր, որ ամուսնու մոտ շականակագեղձի քաղցկեղ է հայտնաբերվել։ 

Հավելենք, որ 57-ամյա տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով և ՀՀ քրեական օրենսգրքի 119-րդ հոդվածի (ֆիզիկական ուժեղ ցավ կամ հոգեկան ուժեղ տառապանք պատճառելը) 2-րդ մասի 1-ին և 3-րդ կետերով, վերջինս կալանավորվել է: Նրա 28-ամյա դստերը մեղադրանք է առաջադրվել՝ ՀՀ քրեական օրենսգրքի 119-րդ հոդվածի 2-րդ մասի 1-ին և 3-րդ կետերով (Խոշտանգում, որը կատարվել է երկու կամ ավելի անձանց նկատմամբ, անչափահասի կամ հանցավորից նյութական կամ այլ կախվածություն ունեցող անձի, ինչպես նաև առևանգված կամ որպես պատանդ վերցված անձի նկատմամբ)։ Միջնորդություն է ներկայացվել դատարան՝ վերջինիս նկատմամբ կալանավորումը որպես խափանման միջոց կիրառելու վերաբերյալ, որը չի բավարարվել։