«Մի անպատասխանտու պատգամավոր կա, ասում է՝ շպրտեք ձեր դիմակները». ԿԳՄՍ նախարար
Մենք դպրոցների և ԲՈՒՀ-երի բացմամբ չպետք է նպաստենք, որ COVID-ով հիվանդների թիվն ավելանա, որովհետև, եթե ավելանում է, մենք էնպիսի իրավիճակ ենք ունենում, որ կարող է կարճ ժամանակ հետո թվերն էնպես վերելք ապրեն, որ ստիպված լինենք նորից դպրոցը փակել: Եվ դա շատ մեծ խնդիր է լինելու կրթական համակարգի համար՝ անընդհատ բացել-փակելով. մենք դա թույլ չենք տալու»,- այսօր ֆեյսբուքյան ուղիղ եթերում հրավիրած համապետական ծնողական ժողովի ընթացքում անդրադառնալով դպրոցների վերաբացելուն, ասաց ԿԳՄՍ նախարար Արայիկ Հարությունյանը:
Նախարարի համոզմամբ, եթե կանոնները պահենք, երեխաները և՛ կրթություն կստանան, և՛ վիրուս չեն տարածի, և հիվանդության աճ չենք ունենա:
Խոսելով դիմակներ կրելու հետ կապված մտահոգությունների մասին, ասաց. «Մենք տեսնում ենք, որ դիմակների հետ կապված կան անհանգստություններ, շահարկումներ: Մի անպատասխանատու պատգամավոր կա, որ ասում է՝ շպրտեք ձեր դիմակները, ոնց որ ինքն է պատասխան տալու վիրուսի տարածման համար և մահերի համար...:
Եթե կանոնները պահում ենք՝ վիրուսը չենք տարածում: Ուսումնասիրությունը ցույց է տվել, որ երեխաների մեծ մասն ասիմպտոմ է հիվանդանում, շատ փոքր տոկոսն՝ այլ ելքով, բայց էս կանոնները պահելու դեպքում՝ 95 տոկոսով ապահովագրում ենք մեզ բոլոր տեսակի վարակներից»,- կրկնեց նախարարը:
