ՏԵՍԱՆՅՈՒԹ. Lավ բան չեք անում. համացանցում քննարկում են հայերի կողմից ադրբեջանցիներին ծեծի ենթարկելու կադրերը

ԱԺ աշխատակազմի լրատվության և հանրության հետ կապերի վարչության նախկին ղեկավար Կնյազ Սարոյանը ֆեյսբուքյան իր էջում գրել է. «Քանի ուշ չէ՝ իշխանության ամենավերին մակարդակով պետք է կոչ արվի դրսի մեր հայրենակիցներին, որ դադարեցնեն «ադրբեջանցի տփելու» այդ ակցիաները, քանի որ ամեն ինչ արդեն վերահսկողությունից դուրս գալու ազդակներ է ցույց տալիս։

Օտար պետության տարածքում մարդ տփելու պրակտիկան մերը չէ, ոգևորությունը կարող է անդառնալի հետևանքներ ունենալ բոլոր առումներով։ Բողոքի ձայն բարձրացնելը, խաղաղ ցույց անելը կամ հրահրված բռնությանը պատասխանելն այլ բան ա, արդեն տեղի ունեցողը մեր շահերից չբխող լրիվ այլ բան»:

Այս թեմայով գրառում է կատարել նաև «Իրազեկ քաղաքացիների միավորում» ՀԿ հիմնադիր, ծրագրերի համակարգող, Հանրային խորհրդի անդամ Դանիել Իոաննիսյանը. «Այո՛, կարելի է և պետք է ինքնապաշտպանվել: Այո՛, կարելի է և պետք է քո վրա զենքով եկողին հոր հարսնիք հիշեցնել: Բայց խնդրում եմ, պետք չի ադրբեջանցի խաղաղ ցուցարար ծեծել, դա պատիվ չի բերում:

Աշխարհի որևէ կետում ազգային հողի վրա խաղաղ մարդ ծեծելով մենք շատ թուլացնում ենք այն պնդումները, որ մենք վեհ ենք դրանից, որ իրենք են, որ խաղաղ բնակչության վրա են հարձակվում:

Դա Ադրբեջանն է, որ սահմանամերձ գյուղերի խաղաղ բնակչության վրա է «դուխը» հերիքում: Դա ադրբեջանական զինվորներն են, որ Թալիշում ծերերի են գնդակահարում ու ականջ կտրում: Դա Ադրբեջանն է, որ հերոսացնում է կացինով քնած մարդուն սպանելը:

Մենք՝ որպես պետություն ու քաղաքացիներ, դրանից վեր ենք, մենք դրանից ուժեղ ենք, մենք հաղթող ենք»:

Ֆեյսբուքյան օգտատեր Մաքսիմ Սարգսյանն էլ գրել է. «Չէ տղեք լավ բան չեք անում։ Արյունլվա ընկած մարդու վրա 60 հոգով հարձակվելով չի հայրենասիրությունը տղեք։Դա ոչ մի տեղ չտանող ճանապաչհ ա ախպերներ ջան»։

Հիշեցնենք՝ ավելի վաղ համացանցում տեսանյութու էր տարածվում, որտեղ մի խումբ հայեր ծեծի են ենթարկում ադրբեջանցիների: