Օրեր առաջ «Հրապարակ» օրաթերթում հրապարակվեց «France Arménie» ամսագրից մի հոդված` «Ապուրի մեջ ընկած մազ» վերնագրով, որտեղ ֆրանսալեզու պարբերականը ներկայացրել էր Հայաստան՝ կորոնավիրուսի դեմ պայքարի շրջանակներում բժիշկների այցը։ Հոդվածում նշվում էր, որ առաքելության արժեքը կազմել է ավելի քան 200 հազար եվրո, որը ներառել է ուղևորության և 5-աստղանի «Մարիոթ» հյուրանոցում մնալու ծախսերը՝ գումարած 1800-ական եվրո աշխատավարձ՝ յուրաքանչյուրին:

ArmDaily.am-ի տրամադրության տակ են գտնվում այս ուղևորությունների կազմակերպման մասով որոշ փաստաթղթեր և տեղեկություններ, ըստ որոնց Հայաստանի պետական հետաքրքրությունների ֆոնդի (ԱՆԻՖ) տնօրեն Դավիթ Փափազյանն իր անձնական միջոցներից չարտերային թռիչքների կազմակերպման համար վճարել է 67,200 եվրո։

Փաստաթղթերի ինքնությունը ճշտելու համար ArmDaily.am-ը զրուցել է Դավիթ Փափազյանի հետ։

Հարցազրույցի ուշագրավ հատվածները ներկայացնում ենք ստորև՝

Փաստաթղթերի և Ձեր ստորագրության ինքնությունը հաստատո՞ւմ եք:

- Այո։

-Ինչո՞ւ եք վճարել 67,200 եվրո 2 օդանավների չարտերային թռիչքների համար Ձեր անձնական միջոցներից։

-Եթե չվճարեի, օդանավերը չէին թռնի, բժիշկները չէին գա Հայաստան, իսկ հաշվի առնելով այս օրերին Հայաստանի բուժհաստատություններում տիրող լարված մթնոլորտը մեր բժիշկներին աջակցությունն անհրաժեշտ էր։

-Պաշտոնական կայքերում և ՀՀ Վարչապետ Փաշինյանին ուղղված Նախագահ Մակրոնի նամակում գրված է, որ Ֆրանսիայի Կառավարությունն է ֆինանսավորել բժիշկների այցը։ Ստացվում է, որ այդպես չէ՞։

-Այդպես է երկրորդ խմբի մասով։ Ֆրանսիայի ԱԳՆ-ն վճարում կատարելուց առաջ պարտավոր է անցնել բյուրոկրատական մի շարք փուլերով։ Քանի որ ժամանակ չկար սպասելու, Ֆրանսիայի ԱԳՆ-ում աշխատող ընկերներս առաջարկեցին, որ ես իմ վրա վերցնեմ ծախսերը, որոնք այնուհետև կփոխհատուցվեն։

-Հրապարակված հոդվածում նշվում էր նաև, որ բժիշկները Կովիդ 19-ի բուժման պրակտիկա չեն ունեցել և վարձատրվել են իրենց գործուղման համար

-Տականքները շատ են թե Ֆրանսիայում, թե Հայաստանում, թե ամենուր։ Այն, թե իբր բժիշկներն անփորձ էին, պատմության ամենազայրացնող հատվածն է։ Այս պահին մեր ֆրանսիացի ընկերները քննարկում են ինչպես հետևողական լինել հարցի շուրջ, և կեղծ տեղեկություններ հրապարակողին, ով էլ դա լինի, համաչափ պատժել։
Իսկ թե ինչու ֆրանսիացի բժիշկները պետք է առանց որևէ վարձատրության՝ ցանկություն ունենային աջակցություն տրամադրել իրենց հայ գործընկերներին, հարցի պատասխանը նույնպես պարզ է. նաև որակյալ մարդիկ շատ են թե Ֆրանսիայում, թե Հայաստանում և թե ամենուր։

-Բոլոր դեպքերում Հայաստանի պետական բյուջեից ինչ-որ ծախսեր կատարվե՞լ են ֆրանսիացի բժիշկների այցի կապակցությամբ։

-5,000 ՀՀ դրամ, որը չնախատեսված ծախսվել է թարգմանության համար, որովհետև մի շարք թարգմանությունների հետ մեկտեղ առաջին խմբի բժիշկների նյութերը պատահաբար հայտնվել էին թարգմանության ուղարկվող այլ թղթերի շարքում։

-Հայ բժիշկ Ժան-Միշել Եխեռյանի հետ խոսել եք Հայաստան գալու նպատակո՞վ։

-Հայկական ազգանունով ֆրանսիացի բժիշկ Եխեռյանի հետ խոսել եմ, այո։ Բժիշկը ինձ հայտնեց, որ Ֆրանսիայում Կովիդ-19-ի դեմ երկարատև պայքարից հետո, ինքը հոգնած է և այդ իսկ պատճառով Հայաստան չի ցանկանում գալ։ Ես շնորհակալություն հայտնեցի ժամանակի համար և բժշկին մաղթեցի փառահեղ հանգիստ Ֆրանսիայի բազմաթիվ հիասքանչ ծովափներց մեկում։ Ֆրանսիացիների և 2 հայազգի բժիշկների հետ Երևան թռնելուց առաջ նկար եմ իրեն ուղարկել, հայտնելով լավ լուրը, որ հաջողվեց ևս 9 պրոֆեսիոնալ կամավոր բժիշկ տանել Հայաստան։ Նկարը Ձեզ էլ կուղարկեմ։ Տեղադրված է կայքում։

- Արդյոք նորմալ եք համարում այն, որ ստիպված ենք այլ երկրներից մասնագետներ հրավիրել Հայաստան:

-Առաջին համաճարակն եմ ապրում, չեմ ասի ինչն է նորմալ, ինչը ոչ։ Բայց, Գերմանիան հիվանդներ էր ընդունում Ֆրանսիայից, իսկ Ռուսաստանը բժիշկներ ուղարկում Իտալիա։ Հաստատ նորմալ է, որ ծանր պահին բարեկամները միմյանց օգնեն։ Կասկած մի ունեցեք, որ հայերը և ֆրանսիացիները բարեկամ ժողովուրդներ են։ Հակադարձաբար էլ, բնական է, որ Հայաստանի Հանրապետության թշնամիները հարձակվում են Թորոսյան Արսենի վրա, ինչպես կոնվենցիոնալ պատերազմի ժամանակ կհարձակվեին պաշտպանության Նախարարի վրա։

-Պլանավորո՞ւմ եք նոր բժշկական խմբեր բերել Հայաստան։

-Կրեք դիմակ, պահպանեք սոցիալական հեռավորություն, պարետատան բոլոր հրահագները. այս դեպքում Ֆրանսիայից այցելող հաջորդ թիմերը կլինեն ներդրողների, այլ ոչ՝ բժիշկների։

Հարցազրույցի ամբողջական տարբերակը սկզբնաղբյուրում