Մայիսի 9-ի փողոցում 28-ամյա երիտասարդի սպանության գործով հետախուզում է հայտարարվել 6 անձի. ՔԿ-ն մանրամասնում է

ՀՀ քննչական կոմիտեի Երեւան քաղաքի քննչական վարչության Շենգավիթ վարչական շրջանի քննչական բաժնում քննվող քրեական գործով պարզվել են Մայիսի 9-ի փողոցում 28-ամյա երիտասարդի սպանության մի շարք հանգամանքներ, այդ թվում՝ զինված միջադեպի մասնակիցների  ինքնությունը, որոնցից 6-ը ներգրավվել են որպես մեղադրյալ` ՀՀ քրեական օրենսգրքի 104-րդ հոդվածի (սպանություն) 2-րդ մասի 6-րդ, 7-րդ կետերով եւ 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով, նրանց նկատմամբ հայտարարվել է հետախուզում եւ խափանման միջոց է ընտրվել կալանավորումը:

Ձեռնարկվում են միջոցառումներ` դեպքի բոլոր հանգամանքները, հանցագործության գործիք հանդիսացող հրազենները, ինչպես նաեւ՝ ենթադրյալ հանցագործություն կատարած անձանց հայտնաբերելու, նրանցից յուրաքանչյուրի գործողություններն անհատականացնելու ուղղությամբ:

Ավելի վաղ հայտնել էինք, որ 2020 թվականի հունիսի 9-ին՝ ժամը 17։00-ի սահմաններում, Երեւան քաղաքի Մայիսի 9-ի փողոցի շենքերից մեկի բակում 28-ամյա երիտասարդի եւ մի խումբ անձանց միջեւ տեղի էր ունեցել վիճաբանություն, որի ընթացքում ապօրինաբար կյանքից զրկելու դիտավորությամբ, չպարզված հանգամանքներում ապօրինի ձեռք բերած եւ ապօրինի պահված հրազեններով, շատերի կյանքի համար վտանգավոր եղանակով, կրակահերթ էր արձակվել 28-ամյա երիտասարդի ուղղությամբ։

Նախաքննությունը շարունակվում է: