Աշակերտները ըստ գրաֆիկի 5 կամ 10 հոգանոց խմբերով եկել են վկայական ստանալու․ ի՞նչ է տեղի ունեցել թիվ 132 դպրոցում․ NEWS

Երեւանի թիվ 132 դպրոցում, որի բակից արված լուսանկարը որպես սոցիալական հեռավորություն չպահելու օրինակ վարչապետ Նիկոլ Փաշինյանը հրապարակել էր ֆեյսբուքյան իր էջում, այսօր՝ հունիսի 3-ին, ավարտական վկայականների ստացում եւ գրքերի հանձնում է իրականացվել։ 

Այս մասին NEWS.am-ի հետ զրույցում ասաց դպրոցի տնօրեն Լիլիթ Հովհաննիսյանը։ 

«Գրաֆիկ էր կազմված, ըստ գրաֆիկի են եկել աշակերտները՝ 5 կամ 10 հոգանոց խմբերով։  Շենքի ներս թույլ չենք տվել մտնել, դրսում՝ բակում տեղադրված է եղել սեղան, որին մոտեցել, հերթով ստացել են ատեստատները, ստորագրել, մյուսի մոտ էլ հանձնել գրքերը, ապա հեռացել»,- ասաց նա։ 

Տնօրենը հայտնեց, որ լուսանկարի հրապարակումից հետո իրեն կանչել են քաղաքապետարանից,  որտեղ էլ բացատրություն է գրել, թե ինչպես է կազմակերպել գործընթացը։ Միեւնույն ժամանակ, տնօրենը չընդունեց, որ չեն պահվել համապատասպան նորմերը՝ հաշվի առնելով, որ բաց տարածություն է եղել։ 
   
Հիշեցնենք, որ վարչապետ Նիկոլ Փաշինյանը ֆեյսբուքյան իր էջում տարածել էր լուսանկարը հետեւյալ գրառմամբ՝ ըստ օգտատիրոջ՝ Երևանի թ. 132 դպրոց, Արամ Խաչատրյան փողոց, հենց հիմա: