Բեռլինի բնակիչները ընդդեմ կարանտինի դուրս են եկել ցույցի. ոստիկանությունը բերման է ենթարկել 100 հոգու
Հարյուրավոր բեռլինցիներ այսօր հավաքվել և բողոքի ակցիա են իրականացրել ընդդեմ կարանտինային սահմանափակումների, որոնք կիրառվում են իշխանությունների կողմից կորոնավիրուսի համաճարակի դեմ պայքարում, տեղեկացնում է «Regnum. ru» գործակալությունը։
Ակցիան պետք է անցկացվեր Ռոզա Լյուքսենբուրգի անվան հրապարակում, սակայն ոստիկանությունը փակել է հրապարակ տանող ճանապարհը։ Սակայն մի քանի հարյուր ցուցարարներ կարողացել են իրենց պահանջը ներկայացնել իշխանություններին։ Հիմնական պահանջը եղել է «սահմանադրական իրավունքների վերականգնումը»։ Սահմանափակումները, ըստ ցուցարարների, քաղաքացիական, տնտեսական իրավունքների խախտում է։
Հավաքին մասնակցել են Գերմանիայի մի շարք կուսակցությունների ներկայացուցիչներ: Ցույցը հսկել են 200-ից ավելի ոստիկաններ: Ինչպես հայտնում է Գերմանիայի ոստիկանությունը, բերման է ենթարկվել 100 մարդ, որոնք չեն պահպանել սոցիալական հեռավորությունը:
Ներկա պահին Գերմանիայում կա կորոնավիրուսի հաստատված 155 054 դեպք: Մահացել է 5767-մարդ, առողջացել 109 800-ը:
