Վրաստանն ու Լեհաստանը շուտով մեծ քանակով մարտական անօդաչու թռչող սարքեր կարտադրեն

Վրաստանը մոտ ապագայում Լեհաստանի հետ համատեղ կսկսի մեծ քանակով մարտական անօդաչու թռչող սարքեր արտադրել: Այս մասին է հայտարարել Վրաստանի պաշտպանության նախարար Ջուանշեր Բուրչուլաձեն:

«Մենք ամբողջությամբ պատրաստել ենք անհրաժեշտ ենթակառուցվածքը, փորձնական թռիչքներ ենք իրականացրել, Լեհաստանից բերել ենք փորձնական նմուշները: Եթե ոչ առաջիկա օրերին, ապա օգոստոսին կամ սեպտեմբերին կսկսենք զանգվածային արտադրությունը», - «Իմեդի» հեռուստակայանի թղթակցի հետ զրույցում ասել է Վրաստանի պաշտպանության նախարարը:

Մարտական ԱԹՍ-ներ արտադրելու գաղափարը Վրաստանում սկսել են քննարկել 2021 թվականին: 2022-ի նոյեմբերին WB Electronics լեհական ընկերությունը և «Դելտա» վրացական ռազմագիտատեխնիկական կենտրոնը ստեղծել են «Դելտա-ՎԲ» համատեղ ձեռնարկությունը, որը պետք է ԱԹՍ-ներ արտադրի:

Այս տարվա հունվարին արտադրվել են Warmate տեսակի առաջին «կամիկաձե» և FlyEye տեսակի առաջին հետախուզական ԱԹՍ-ները:

Warmate-ը համարվում է թիրախային ոչնչացման բարձր արդյունավետություն և ճշգրտություն ունեցող անօդաչու, որը կարող է տարբեր մարտագլխիկներ կրել:

FlyEye-ն, ըստ փորձագետների, կարող է հետախուզական թռիչքներ կատարել բարդ օդերևութաբանական պայմաններում և հաղթահարել հակառակորդի ռադիոէլեկտրոնային համակարգերի ազդեցությունը: