18-ամյա ուսանողը դանակի 6 հարված է ստացել. նա վիրահատության է ենթարկվել

Այսօր Հայաստանի Ֆիզիկական կուլտուրայի եւ սպորտի պետական ինստիտուտի 18-ամյա մի ուսանող տեղափոխվել է Երեւանի թիվ 1 համալսարանական հիվանդանոց: Ուսանողը դանակի 6 հարված է ստացել: Բժշկական կենտրոնի մամուլի խոսնակ Շուշան Դանիելյանը, մեզ հետ զրույցում նշեց, որ 18-ամյա Ավետ Կ.-ին հիվանդանոց տեղափոխելուց հետո կատարվել են բոլոր անհրաժեշտ հետազոտությունները, ինչի արդյունքում պարզվել է, որ երիտասարդը հարվածներ է ստացել որովայնի շրջանում: Բժիշկների ցուցումով կատարվել է վիրահատություն, որն ավարտվել է քիչ առաջ: 

Երիտասարդի վիճակը գնահատվում է միջին ծանրության, ներկա պահին նրա կյանքին որեւէ վտանգ չի սպառնում:

ՀՀ ոստիկանության լրատվական ծառայությունից մեզ հետ զրույցում հայտնեցին, որ ոստիկանություն ահազանգը ստացվել է ժամը 15:00-ին: Նշվել է, որ ազդրերի հատվածում կտրած-ծակած վերքերով հիվանդանոց է տեղափոխվել 2001 թվականին ծնված մի երիտասարդ: Նա նշել է, որ իրեն դանակահարել են Երեւանի Ավետիք Իսահակյանի այգում:

Դեպքի վայր է ժամանել ոստիկանության կենտրոնական բաժնի օպերատիվ խումբը՝ դեպքի հանգամանքները պարզելու համար: