Արդյո՞ք դա վերաբերմունք չէ պետական ապարատին, երբ ջինսով ու բոթասներով են մասնակցում նիստին. Խաչատրյան
Ավագանու արտահերթ նիստին, որի ընթացքում քննարկվում էր Երևանի բյուջեից ամանորյա տոներին ուղղվող գումարի ավելացմանը, ելույթի համար գրանցված «Լույս» խմբակցության անդամ Անի Խաչատրյանը հարց ուղղեց քաղաքապետին.
«Մի քանի օր է մամուլում շրջանառվում են լուրերը, մեջբերեմ քաղաքապետի խոսքը, երբ ասացիք, որ ջինսով ու բոթասներով ներկայանալը վերաբերմունք է պետական ապարատին: Երևանի տեղական ինքնակառավարման մարմնի բարձրագույն նիստն է այսօր, արդյո՞ք դա վերաբերմունք չէ պետական ապարատին, երբ ջինսով ու բոթասներով են ավագանու անդամները ներկա, թե՞ պետական ապարատ չի սա», – ասաց Անի Խաչատրյանը:
Քաղաքապետը պարզապես շնորհակալություն հայտնեց և խոսքը փոխանցեց հերթագրված հաջորդ անդամին, քանի որ Անի Խաչատրյանը հարցը հնչեցրեց ելույթի ժամանակ:
«Իմ քայլը» խմբակցության անդամներից մեկն էլ նիստի ավարտին խորհուրդ տվեց խմբակցության ղեկավարներին բացել կանոնակարգն ու կարդալ և կանոնակարգի խախտմամբ արտահերթ ելույթ չունենան, ինչը, մեղմ ասած, դուր չեկավ ասվածի հասցեատերերին:
