ԼՈՒՍԱՆԿԱՐՆԵՐ. Երեւանում թափառող շները հոշոտել են քաղաքացու 32 հավերին
Երեւանի Ավան-Առինջ թաղամասում թափառող շները հոշոտել են Սուրեն Առաքելյանի 32 հավերին: «Հայկական ժամանակ»-ի հետ զրույցում նա պատմել է, որ այսօր առավոտյան՝ ժամը 8:00-ի կողմերը, բացել է հավաբնի դուռն ու հավերին թողել ցանկապատած տարածք: Իսկ կես ժամ անց բնակարանից իջել է ներքեւ եւ հայտնաբերել կատարվածը: Հարեւաններն են հայտնել, որ շները ցանկապատած տարածք են մտել:
Սուրեն Առաքելյանն Ավան-Առինջ թաղամասում բնակելի շենքի բակում փոքր տարածք ունի, որտեղ արդեն մի քանի տարի է՝ հավեր է պահում: «Ցանկապատը շատ ամուր էր, շները գետինը փորել, տակից մտել էին: Հինգ կամ վեց շուն էին՝ մոխրագույն: Այնքան կատաղած էին՝ կարծես գայլեր լինեին»,- պատմել է հավատերը:
Սուրեն Առաքելյանի խոսքով՝ շեներից մի երկուսը դակած էին, ականջներին դեղին բաներ է նկատել, սակայն չափազանց ագրեսիվ են եղել, փորձել են իրեն էլ վնասել: Վերջինս ստիպված է եղել հող փորելու բահով պաշտպանվել: «Այդ շներին ես տարածքում տեսնում եմ, շատ ռիսկով են: Հարեւաններն էլ են բողոքում, ասում են՝ դպրոց գնալիս երեխաներին միշտ վախեցնում են»,- ասել է նա:
Սուրեն Առաքելյանի խոսքով՝ սա արդեն որերորդ դեպքն է, որ ինքը տուժում է թափառող շների հարձակումից: Նրան պատկանող հավաբնում անցած տարի գարնանն էլի էր նման դեպք գրանցվել: Նա այդպես էլ չի իմացել, թե քանի շուն են եղել եւ որտեղից են մտել այդքան ամուր ցանկապատած տարածք, քանի որ այդ ժամանակ փորված տեղ չի երեւացել:
