Երևանում բուքմեյքերական 40 գրասենյակն էլ հերիք է, որ մարդկանց ընտանիքներ քանդվեն. Գաբրիելյան

«Մի քիչ նեղսրտած եմ, որովհետև իրականում մենք ինչ խոստացել ենք, չենք անում: Խոստացել ենք, որ փակելու ենք, բայց հիմա եթե ամեն վարչական շրջանում մեկ հատ թողնենք, 4 ընկերություն կա, և փաստորեն թողնում ենք, որ Երևանում 40 գրասենյակ գործի: Վաղը եթե 5-րդ ընկերությունը բացվի, 50 հատ գրասենյակ կլինի: Երևանի համար 40 գրասենյակն էլ բավական է, որ մարդիկ իրենց տուն-տեղը կորցնեն, ընտանիքներ քանդվեն».

 հոկտեմբերի 2-ին ԱԺ նիստում «Վիճակախաղերի մասին» ՀՀ օրենքում լրացումներ կատարելու մասին» օրինագծի երկրորդ ընթերցմամբ քննարկման ժամանակ ասաց «Իմ քայլը» խմբակցության պատգամավոր Սիսակ Գաբրիելյանը:

Նկատենք, որ օրինագծով նախատեսվում է սահմանափակել բուքմեյքերական գրասենյակների թիվը: Ըստ այդմ՝ ամեն մարզկենտրոնում և Երևանի ամեն վարչական շրջանում թողնել մեկական գրասենյակ: Բացի այդ՝ գրասենյակների գործունեությունը թույլատրված է Ծաղկաձոր, Ջերմուկ, Մեղրի և Սևան քաղաքներում:

Ս. Գաբրիելյանի դիտարկմանն ի պատասխան՝ ԱԺ տնտեսական հարցերի մշտական հանձնաժողովի նախագահ Բաբկեն Թունյանն ասաց.

«Եթե այդպիսի եղանակ լիներ, որ հնարավոր լիներ մեկ զարկով միանգամից ամեն ինչն արգելել, հավատացեք, որ այդ տարբերակին կգնայինք: Բայց եթե մենք բուքմեյքերական կետերի գործունեությունը կտրուկ արգելում ենք, օնլայն տիրույթում ոչինչ չենք անում, այդտեղ շուկայում անհավասար մրցակցություն է ստեղծվում, և մենք ունենում ենք ոչ թե խաղամոլության դեմ պայքարի սահմանափակում, այլ շուկայի մոնոպոլացում:

 Այս նախագծով լուծում ենք կանխիկով կատարվող խաղադրույքների հարցը, սակայն մեզ համար խնդիր է օնլայն տիրույթում խաղադրույքների հարցը: 

Խաղադրույքների մեծ մասը կատարվում են օնլայն ռեժիմում: Այնպես չլինի, որ մարդիկ խաղան արտասահմանյան կայքերում, և կստացվի, որ ո՚չ խաղամոլության դեմ պայքարեցինք, ո՚չ էլ որևէ օգուտ տվեցինք: Միակ վնասն այն կլինի, որ փողը երկրից կգնա դուրս: Քանի դեռ օնլայն տիրույթում այդ լուծումը չենք գտել, ճիշտ կլինի այս կետերին հնարավորություն տանք ադապտացվեն այդ փոփոխություններին: Հետո երբ ավելի լուրջ տարբերակներ կլինեն խնդիրն ավելի արմատական լուծելու համար, իհարկե այդ տարբերակին կգնանք: Որևէ մեկը մեր ձեռքը չի բռնել»,- ասել է Բ. Թունյանը:

Ալեն Սիմոնյանն էլ եզրափակիչ ելույթում, անդրադառնալով Ս. Գաբրիելյանի՝ նոր գրասենյակներ բացելու հնարավորությանը, նկատեց, որ նոր կազմակերպություն բացելը մեծ ծախսերի հետ է կապված: Դուստր ձեռնարկությանը լիցենզիան չի կարող փոխանցվել, իսկ նոր լիցենզիա ստանալն էլ «թանկ» է: «Ինչ վերաբերում է քաղաքներին, ապա նախատեսվում է մինչև 2022թ. ընդհանրապես արգելել գրասենյակների գործունեությունը»,- ասել է Ա. Սիմոնյանը:

Նշենք, որ օրինագիծն ընդունվելու դեպքում ուժի մեջ կմտնի 2020թ. նոյեմբերի 1-ից: