Մարզահամերգայինի դիմաց Կարեն Դեմիրճյանի արձանը կտեղադրվի

Մարզահամերգայինի դիմաց կտեղադրվի Կարեն Դեմիրճյանի արձանը. որոշումն ընդունվեց

Կառավարությունն այսօրվա նիստում ընդունեց ՀՀ 2019 թվականի պետական բյուջեում վերաբաշխում կատարելու և Կառավարության 2018 թվականի դեկտեմբերի որոշման մեջ փոփոխություններ կատարելու մասին նախագիծը:

Տարածքային կառավարման և ենթակառուցվածքների նախարար Սուրեն Պապիկյանը նշեց, որ նախագծի ընդունումը պայմանավորված է Կարեն Դեմիրճյանի անվան մարզահամերգային համալիրի տարածքում Կարեն Դեմիրճյանի արձանի նախագծային աշխատանքների իրականացման անհրաժեշտությամբ:

«Նախատեսվում է Երևան համայնքին սուբվենցիա տրամադրելու համար ՀՀ տարածքային կառավարման և ենթակառուցվածքների նախարարությանը կառավարության պահուստային ֆոնդի հաշվին հատկացնել 3մլն 281 հազար դրամ: Ըստ քանդակագործ Սարգիս Բաբայանի կողմից ներկայացված նախահաշվի՝ հուշարձանի կառուցման համար անհրաժեշտ կլինի 54,2 մլն դրամ: հարցը քննարկվել է նաև Կարեն Դեմիրճյանի ընտանիքի անդամների հետ: Արձանը հենց այդտեղ տեղադրելու ցանկությունն ու նախաձեռնությունը հենց նրանց է եղել, կառավարությունն ընդառաջ է գնացել վերջիններիս խնդրանքին»,-նշեց Պապիկյանը:

«Եթե չեմ սխալվում, նոր տեղն առաջարկվել է Երևանի քաղաքապետարանի կողմից և ընտանիքը համաձայնել է։ Ի վերջո, մենք գիտենք, որ Կարեն Դեմիճյանի արձան տեղադրելու հետ կապված արդեն վաղուց կա որոշում և ի սկզբանե նախատեսված էր այդ արձանը տեղադրել Մաշտոցի պողոտայում, բայց ինչ-ինչ հանգամանքներով, նաև տարածքում քաղաքաշինական զարգացումների բերումով և տեղն էլ ընտանքիքի անդամների կողմից պակաս ընդունելի դիտվեց և առաջացավ այդպիսի գաղափար՝ նոր տեղ փնտրելու վերաբերյալ: Ի վերջո քաղաքապետարանն առաջարկեց Մարզահամերգային համալիրի դիմաց տեղադրել արձանը.Կառավարությունն ու ընտանիքն իրենց համաձայնությունը տվեց: Ներկայացվել է արձանի մակետը, որը նույնպես ընդունելի է : Հետևաբար հիմա պաշտոնապես գործընթացին ընթացք ենք տալիս»,-ասաց վարչապետը՝ Պապիկյանից հետաքրքրվելով, թե ինչ ժամկետում այն պատրաստ կլինի:

«Թույլ տվեք հիմա ժամկետներ չասել, այնուամենայնիվ պետք է խնդրենք, որ հնարավորինս սեղմ ժամկետներում դա կատարվի»,-պատասխանեց նախարարը:
Փաշինյանն էլ նկատեց, որ շատ կարևոր է, որ հարցը չկանգնի և չմնա անկատար, ինչպես երբեմն տեղի է ունենում:

Պապիկյանն էլ հավելեց, որ հետևողական կլինեն: