Սիրիայում հայկական խումբը ականազերծել է 34 հազար 693 ք/մ տարածք

Հումանիտար ականազերծման ու փորձագիտական կենտրոնի խումբը Սիրիայում առանձնացրել է 5 հաստատաված վտանգավոր տարածք, այսօր լրագրողների հետ հանդիպմանն ասաց Հումանիտար ականազերծման և փորձագիտական կենտրոնի տնօրեն Ռուբեն Առաքելյանը:

«Ընդհանուր առմամբ, առաջին խմբի կողմից ականզերծվել է 34 հազար 693 ք/մ տարածք, հայտնաբերվել է 29 միավոր ական ու պատերազմի պայթուցիկ մնացորդ, որոնք ոչնչացվել են Սիրիայի իշխանության կողմից, մենք պայթեցման աշխատանք չենք իրականացնում», - ասաց նա:

Նրա խոսքով՝ իրականացվել է նաև բժշկական աջակցություն. հայկական խմբում եղել է ութ բժիշկ:

«Կատարվել է մոտ հազար թերապևտիկ միջամտություն, չորս հարյուր վիրաբուժական միջամտություն, 1300-ից ավելի լաբորատոր բուժօգնություն», - ասաց նա:

Կենտրոնի տնօրենն  առաջին խմբի աշխատանքը գնահատեց բավարար, որովհետև աշխատանքը մի քիչ ավելի դանդաղ էր ընթանում, քանի որ տեխնիկական դժվարություններ են եղել, որոնք լուծվել են:

«Երկորրդ խումբը գտնվում է ավելի բարենպաստ պայմաններում», - ասաց նա:

Անդրադառնալով վիրավորում ստացած մասնագետին՝ Հումանիտար ականազերծման ու փորձագիտական կենտրոնի տնօրենն ասաց, որ նրա առողջական վիճակը բավարար է:

«Եթե չհաշվենք անդամահատությունը, առողջական այլ խնդիրներ չունի,  գտնվում է Երևանում, մոտ մեկ-երկու ամսից կկրի հատուկ պրոթեզ», - ասաց նա: