Ոստիկանության 4 հոգանոց խումբն այսօր՝ մայիսի 21-ին այցելել է «Ադեկվադ» հասարակական կազմակերպության գրասենյակ: Այս մասին ֆեյսբուքյան ուղիղ եթերի միջոցով հայտարարեց Blognews. am կայքի խմբագիր, «Ադեկվադ» ՀԿ անդամ Կոնստանտին Տեր-Նակալյանը: Նրա տեղեկացմամբ՝ ոստիկանության աշխատակիցները «Ադեկվադ» ՀԿ-ի համահիմնադիր Արթուր Դանիելյանին էին որոնում, որպեսզի վերջինիս ծանուցագիր հանձնեին: Ավելի ուշ Կոնստանտին Տեր-Նակալյանը ֆեյսբուքյան էջում հետևյալ գրառումը կատարեց. «Ոստիկանությունը երեկ Կասկադում եղած բոլոր Ադեկվադներին ծանուցումներ է ուղարկել, թե բա հրավիրում ենք ոստիկանություն` Իսպիրյանի հաղորդման շուրջ պարզաբանումներ տալու: Իհարկե, զավեշտալի է այն, որ եթե առաջ ջեբդ պլան էին գցում, հիմա ուզում են Իսպիրյան գցեն, բայց ես այսօր հավես չունեմ, ուստի պաշտոնապես հայտարարում եմ, որ Ոստիկանության հրավերը չեմ ընդունում և այդ կլյաուզնիկի հաղորդման շուրջ որևէ պարզաբանում տալ չեմ պատրաստվում»: Հիշեցնենք, որ զանգվածային լրատվության միջոցներում տեղեկատվություն էր տարածվել, թե մի խումբ անձինք «Կասկադ»-ի տարածքում մոտեցել են երգիչ, Երևանի ավագանու «Իմ քայլը» խմբակցության անդամ Արթուր Իսպիրյանին, քաշքշել, հայհոյանքներ հնչեցրել նրա հասցեին: Ոստիկանությունից տեղեկացրել էին, որ ճշտվել է Արթուր Իսպիրյանի հետ տեղի ունեցած միջադեպի մասնակիցների ինքնությունը: