Խաչատրյան քույրերի փաստաբանները քրգործը կասեցնելու միջնորդություն կներկայացնեն
ՌԴ մայրաքաղաք Մոսկվայում իրենց հոր սպանության մեջ կասկածվող Խաչատրյան քույրերի փաստաբանները պատրաստվում են խնդրել, որպեսզի կասեցվի քրեական գործը՝ հանցագործության տարրերի և ապացույցների բացակայությամբ պայմանավորված: Այս մասին հայտնում է Комсомольская правда-ն՝ վկայակոչելով փաստաբաններից Ալեքսեյ Պարշինին:
Նրա խոսքով՝ բոլոր փորձաքննությունների պատասխանները ցույց են տալիս, որ աղջիկները միայն պաշտպանվել են և ստիպված են եղել նման սարսափելի արարք գործել:
«Նրանք գտնվել են անհրաժեշտ պաշտպանության վիճակում: Հոգեբանական փորձաքննությունը հաստատում է դա: Նրանց նկատմամբ մշտապես հանցագործություն է կատարվել, քույրերն ապրում էին հոգեբանական ճնշված վիճակում»,- ասել է փաստաբանը:
Մայիսի 20-ից հետո փաստաբանները մտադիր են դիմել Քննչական կոմիտե՝ հետաքննությունը դադարեցնելու միջնորդությամբ:
Հիշեցնենք, որ այսօր ավելի վաղ հայտնի էր դարձել, որ քննությունը պարզել է, որ քույրերի հոր մոտ խանգարումներ են բացահայտվել: Աղջիկների մայրը հաստատել է, որ քննիչները ապացույցներ են ձեռք բերել աղջիկների նկատմամբ սեռական բնույթի բռնության մասին:
Կրիստինա, Անգելինա և Մարիա Խաչատրյաններին ձերբակալել են նախորդ տարվա հուլիսին: Բնակարանում աղջիկները սպանել էին իրենց հորը՝ 40 դանակի հարված հասցնելով նրան:
