Արագածոտնի մարզի Արագածավան համայնքի բնակիչները բացել են Արտենի-Արագած գլխավոր ճանապարհը: Այս մասին այսօր՝ մայիսի 10-ին, NEWS. am-ի հետ զրույցում հայտնեց Արագածավանի գյուղապետ Անդրանիկ Պապիկյանը: Համայքնի բնակիչները առավոտից մինչև երեկո փակ էին պահել Արտենի-Արագած գլխավոր ճանապարհը: Նրանք պահանջում էին Ջրային կոմիտեի նախագահ Վարդան Մելքոնյանի հետ հանդիպում, որպեսզի քննարկեն ոռոգման ջրի սակագնի իջեցումը: Գյուղապետն ասաց, որ Ջրային կոմիտեի նախագահը այսօր եկել հանդիպել է ցուցարարների հետ։ Ժամ ու կես զրույցից հետո որոշվել է, որ առանց վճարի՝ մինչև երեքշաբթի օրը բնակիչները կարող են ոռոգել իրենց դաշտերը: «Պայմանավորվեցինք, որ մեր հարցադրումները կլսեն երեքշաբթի օրը: Ոռոգման ջուրը դարձել է 1 հա–ի համար 57 հազար դրամ, իսկ դա չափազանց թանկ է: Մեկ սեզոնին արտերը պետք է ջրվեն 5-6 անգամ: Մինչև երեքշաբթի օրը ազատ ռեժիմով կարող են ջրել»,- ասաց գյուղապետը՝ հավելելով, որ Ջրային կոմիտեից եւս մեկ անգամ կգան՝ բնակիչների հետ քննարկելու ոռոգման ջրի սակագնի հարցը։ «Հանձնաժողովի հետ կգնանք, արտերի գլխին կկանգնենք, կտեսնենք ոռոգման ջրի սակագնի վերանայում կլինի, թե՝ ոչ»,- ասա նա: Հիշեցնենք, որ մայիսի 8-ին Արագածավանի բնակիչները փակել էին Երևան-Գյումրի ավտոճանապարհը, և պահանջում էին հանդիպում Ջրային կոմիտեի նախագահի հետ: Կոմիտեից խոստացել էին 2 օրից գալ եւ լսել նրանց պահանջները։ Այսօր՝ մայիսի 10-ին բնակիչները կրկին փակել էին Արտենի-Արագած գլխավոր ճանապարհը, և սպասում էին Ջրային կոմիտեի նախագահին: