Եվրոմամաներ կամ եվրոքույրիկներ. Փաշինյանը Գերմանիայի և Լիտվայի առաջնորդների մասին
Ինչպես արդեն հայտնել էինք, Loft ակումբում տեղի ունեցավ ՀՀ վարչապետ Նիկոլ Փաշինյանի «Երկրի հակառակ կողմը» գրքի քննարկումը, որին ներկա էր նաեւ ինքը՝ վարչապետը։
Փաշինյանը հանդիպման ընթացքում խոսեց նաեւ Եւրոպայի երկու առաջնորդների՝ Անգելա Մերկելի եւ Լիտվայի նախագահի մասին․
«Ես ուզում եմ անկեղծ խոստովանություն անել Եվրոպայի 2 լիդերների մասին։ Առաջինը՝ Անգելա Մերկելն է, երկրորդը՝ Լիտվայի նախագահը։ Այս 2 անհատներն ինձ ցնցել են եւ զարմացրել են այն հոգատարությամբ ու խանդաղատանքով, որով նրանք վերաբերել են եւ վերաբերում են Հայաստանում տեղի ունեցած իրադարձություններին։ Առաջին մեր խոսակցությունից զգացել եմ էն ջերմությունը, էսպես ասած, էն վախը, որ հանկարծ էս ամենը չձախողվի՝ զգույշ կլինես էստեղ, էս մի բանը էսպես չանես, այ սենց խնդիր կա, իմ փորձից գիտեմ, եւ այդ հոգատարությունը իմ զգացած ամենացնցող դրվագն է եւ կոնկրետ Անգելա Մերկելի հետ կապված, եւ դա շատ հուզիչ պահ է։ Ես իրենց անվանում եմ եվրոմամաներ կամ եվրոքույրիկներ, ասոցիացիան էդպես է։ Երբ որ նրանք այնպիսի խանդաղատանքով են վերաբերում էս ամեն ինչին, ինչպես հարազատ մայրը, քույրը կամ ընտանիքի անդամները կարող են վերաբերել այս ամենին»,- ասաց նա՝ հավելելով․
«Եւ այս ամենում աշխարհաքաղաքական ոչ մի թակարդ, ոչ մի նենգություն չկա, կար մարդկային, սովորական, պարզ հոգատարություն մի երեւույթի համար, որ իրենց համար էլ անհասկանալի է, բայց, չգիտեմ ինչի, իրենց համար էլ դարձել է շատ սիրելի»։
