Լոգիստիկ հեղափոխություն․ Չինաստանը գործարկում է նոր ծովային երթուղի

Չինաստանը օգոստոսի 15-ին կգործարկի Չինաստան–Եվրոպա առաջին շաբաթական արկտիկական կոնտեյներային էքսպրես երթուղին, որը կանցնի Հյուսիսային ծովային ճանապարհով։ Այս մասին հայտնում է «Xinde Marine News»-ը։

Անցյալ տարի Չինաստանի պետական «Global Times» թերթը հայտնել էր, որ աշխարհում առաջին նավը, որն անցել է Չինաստան–Եվրոպա արկտիկական կոնտեյներային էքսպրես երթուղով, 2025 թվականի սեպտեմբերի 24-ին դուրս է եկել աշխարհի ամենամեծ բեռնաշրջանառություն ունեցող Նինբո-Չժոուշան նավահանգստից դեպի Մեծ Բրիտանիայի Ֆելիքստոու նավահանգիստ։

«Sea Legend Line Limited» ընկերությունը օգոստոսին կվերսկսի իր «CAX China-Europe Arctic Express» ծառայությունը՝ 2026 թվականի արկտիկական նավարկության սեզոնի ընթացքում Նինբո-Չժոուշան նավահանգստից իրականացնելով ութ անընդմեջ շաբաթական ուղևորություն», — նշվում է հաղորդագրության մեջ։

Տեղական լրատվամիջոցների տվյալներով՝ սա այս երթուղու առաջին շաբաթական արկտիկական կոնտեյներային էքսպրեսն է։

Առաջին նավարկությունը կմեկնարկի Նինբոյից օգոստոսի 15-ին և կիրականացվի «Dubai Tower» նավով։ 

«Sea Legend Line Limited»-ի հայտարարության համաձայն՝ Նինբո-Չժոուշան նավահանգստից մինչև Ֆելիքստոու անցումը կտևի մոտ 20 օր, ինչը բեռնափոխադրողներին կտրամադրի Չինաստանի և Եվրոպայի միջև ծովային փոխադրումների ավելի արագ տարբերակ։