ԻՀՊԿ-ից գաղտնի կապ էին պահում ինձ հետ. Ռեզա Փեհլևի

ԻՀՊԿ-ում կային զինվորականներ, որոնք գաղտնի կապ էին պահում ինձ հետ: Ռեզա Փեհլևին բացահայտել է Թեհրանի էլիտայի հետ գաղտնի շփումները

Իրանի վերջին շահի որդին՝ Ռեզա Փեհլևին, հայտարարել է իրանական ուժային կառույցների, այդ թվում՝ Իսլամական հեղափոխության պահապանների կորպուսի (ԻՀՊԿ) ներկայացուցիչներից ստացվող ծածուկ ազդանշանների մասին։ Նրա խոսքով՝ Թեհրանի ուժային հենարանի ներսում ավելանում է նրանց թիվը, ովքեր իշխող վարչակարգից հեռանալու ճանապարհներ են փնտրում։

Reuters-ին տված հարցազրույցում Փեհլևին պատմել է, որ սոցիալական ցանցերում կանոնավոր կերպով ուղղակի դիմումներ է ստանում գործող ուժայիններից։ «Ինձ գրում են․ «Ես բասիջի եմ Մաշհադից» կամ «Ես ծառայում եմ ԻՀՊԿ-ում այսինչ երկրում»։ Նրանք ասում են․ «Մենք ատում ենք այս վարչակարգը։ Մենք նրանց հետ չենք։ Մենք առանձնանալու հնարավորություն ենք փնտրում»»,- պատմել է նա։

Փեհլևին ընդգծել է, որ ուղղակի բանակցություններ չի վարում Կորպուսի բարձրագույն հրամանատարության հետ, սակայն հաստատել է տեղերում գաղտնի շփումների առկայությունը։ Նրա պնդմամբ՝ «Սեպահի» (ԻՀՊԿ) ներկայացուցիչները և բանակային զինվորականներն իրենք են կապ հաստատել իր հետ, ինչը կարող է վկայել Իրանի անվտանգության առանցքային կառույցների ներսում թաքնված պառակտման մասին։