Հայկական սերտիֆիկատների շուրջ խնդիր Ռուսաստանում․ կասեցվել են մի շարք փաստաթղթեր

Ռուսաստանի Հավատարմագրման դաշնային ծառայությունը՝ «Ռոսակկրեդիտացիան», առաջին անգամ կասեցրել է Հայաստանի սերտիֆիկացման մարմինների կողմից տրամադրված մի շարք փաստաթղթերի գործողությունը։

Ինչպես հայտնում է գերատեսչությունը, խոսքը թեթև արդյունաբերության արտադրանքի համար նախատեսված չորս սերտիֆիկատների և սննդամթերքի վերաբերյալ մեկ հայտարարագրի մասին է։

Որոշումները վերաբերում են հայկական երկու կազմակերպությունների՝ «Արմտեստ» ՍՊԸ-ին և «Արմ-Տեստ» ՍՊԸ-ին։

«Արմտեստ» ՍՊԸ-ի (026/S-043) փաստաթղթերի գործողությունը դադարեցվել է հուլիսի 10-ից՝ 12 ամիս ժամկետով, իսկ «Արմ-Տեստ» ՍՊԸ-ի (025/S-057) որոշ փաստաթղթեր ժամանակավորապես կասեցվել են։

Ռուսական կողմը որպես հիմք նշել է այն, որ չեն ներկայացվել արտադրանքի նմուշների ներմուծումը հաստատող փաստաթղթեր, ինչպես նաև բացակայել են անհրաժեշտ փորձարկումների արձանագրությունները։

«Ռոսակկրեդիտացիայի» ղեկավար Դմիտրի Վոլվաչը նշել է, որ ծառայությունը գործում է հստակ չափանիշներով և համագործակցում է ԵԱՏՄ գործընկերների հետ։

«Արմտեստ» ընկերության վերաբերյալ որոշումը, ըստ ռուսական գերատեսչության, համահունչ է նաև Հայաստանի հավատարմագրման ազգային մարմնի դիրքորոշմանը, քանի որ կազմակերպության փաստաթղթերի գործողությունը մինչ այդ արդեն դադարեցվել էր Հայաստանի տարածքում։

«Ռոսակկրեդիտացիան» հայտնել է նաև, որ նախկինում դադարեցրել է ԵԱՏՄ անդամ երկրների ևս 10 սերտիֆիկացման մարմինների փաստաթղթերի գործողությունը։ Տեղեկությունը փոխանցվել է Եվրասիական տնտեսական հանձնաժողովին և Հայաստանի հավատարմագրման ազգային մարմնին։